Avropa Birliyinin Azərbaycan üçün 2006-cı il üzrə sonuncu TACİS (MDB ölkələrinə texniki yardım) proqramının ilin sonunadək təsdiq olunacağı gözlənilir. TACİS-in Azərbaycandakı koordinasiya bürosunun icraçı direktoru Əsgər Ələkbərovun Trend ə verdiyi xəbərə görə, hazırda proqram ölkənin dövlət qurumlarında razılaşdırılır. Proqramın büdcəsi 22 mln. avro təşkil edir.
2006-cı il üçün Azərbaycan üzrə TACİS proqramına ölkədə investisiya iqliminin yaxşılaşdırılması üzrə 3 mln. avro dəyərində layihə, 3 mln. avro dəyərində İqtisadi İnkişaf Nazirliyinin institusional dəstəyi üzrə layihə, 3 mln. avro dəyərində peşəkar-texniki təhsil sisteminin islahatları, eləcə də avadanlıq tədarükü layihələri, treninqlərin keçirilməsi və başqa layihələr daxildir.
14 il ərzində AB tərəfindən Azərbaycana göstərilən birbaşa texniki yardımın ümumi həcmi 419 mln. avro, o cümlədən Tacis proqramı üzrə - 127,5 mln. avro təşkil edir. Vəsaitlər institusional, inzibati və hüquqi islahatlara, iqtisadi inkişafa yönəldilib. Avropa komissiyasının Ərzaq təhlükəsizliyi üzrə proqramı üçün 85 mln. avro ayrılıb və həmin vəsait dövlət büdcəsinə yönəldilib. AB - 92 mln. avro, EXAP proqramı çərçivəsində - 30 mln. avro və REHAB tərəfindən 18 mln. avro məbləğində humanitar yardım göstərilib.