Neft sektorunu nəzərə almadan 2006-cı ilin 9 ayının yekunu üzrə ÜDM artımı 8% təşkil edib. Trend xəbər verir ki, bu barədə üç rübün yekununa həsr olunmuş bugünkü mətbuat konfransında Dövlət Statistika Komitəsinin sədri Arif Vəliyev məlumat verib. Azərbaycan ümumi məhsulun adambaşına düşən gəlir göstəricisi üzrə yalnız Rusiya, Qazaxıstan və Belorusdan geridə qalır.
Onun sözlərinə görə, hesabat dövründə kənd təsərrüfatı istisna olmaqla, iqtisadiyyatın bütün sahələrində artım müşahidə olunur. Kənd təsərrüfatı sahəsində 1% səviyyəsində enmə qeydə alınıb. Bu zaman taxılçılıqda istehsal həcmləri 2% azalıb, kartof, pambıq, tərəvəz kimi digər kənd təsərrüfatı məhsulları üzrə isə yığım hələ də davam edir. Dövlət Statistika Komitəsi başçısının fikrincə, bu istiqamətlərdə də istehsal həcmi ötən ilin analoji dövründəkindən az olacaq. Bu, hava şəraitinin pis olması və əkin sahələrinin azalması ilə əlaqədardır. Bitkiçilikdə enmə cəmi 3% təşkil edib. Heyvandarlıqda isə artım 1,6% səviyyəsində olub.
Bununla yanaşı, 9 ay ərzində kredit qoyuluşlarının artımı 55%, əhalinin əmanətlərinin artımı 48%- 668 mln. manatadək, kapital qoyuluşlarının artımı 16,4% - 4,251 mlrd. manata qədər artıb. İşçilərin orta aylıq əmək haqqı 160 ABŞ dolları, əhalinin adambaşına düşən gəlir isə 888 manat təşkil edib.
