Bakıda Azərbaycan-İordaniya biznes- forumu və İordaniya milli sərgisinin noyabrın 7-də keçirilməsi planlaşdırılıb. Bu barədə Trend ə Azərbaycan İxrac və İnvestisiyaların təşviqi fondundan (AZPROMO) məlumat verilib. Azərbaycan tərəfdən tədbirlərin təşkilatçısı qismində İqtisadi İnkişaf Nazirliyi və AZPROMO, İordaniya tərəfdən isə - Ticarət palatası, Sənaye palatası və Biznesin inkişafı üzrə korporasiya çıxış edir.
AZPROMO-dan verilən məlumata görə, tədbirlər İordaniya krallığının baş naziri Maruf Əl Baxitin (Marouf Al Bakhit) Azərbaycana səfəri çərçivəsində keçiriləcək.
İordaniyadan tikinti sektoru, kimya, qida sənayesi, səhiyyə, kənd təsərrüfatı, məişət avadanlığı istehsalı sahəsində 30-dan artıq şirkətin nümayəndələri gələcək. Biznes -forumda Azərbaycanın təxminən 50 şirkətinin iştirakı planlaşdırılır. Forum çərçivəsində sərgi açılacaq və beş gün davam edəcək.
Tədbirlər Bakı biznes mərkəzində keçiriləcək.
