Azərbaycanda dəmir yolları vasitəsilə nəqliyyata və ticarətə yardım layihəsi ilə bağlı danışıqlar Dünya Bankının nəqliyyat üzrə baş mütəxəssisi və layihə rəhbəri Cerald Olivyenin rəhbərliyi ilə Bakıya səfəri zamanı davam etdiriləcək. Trend ə verilən məlumata əsasən, görüş yanvarın 29-da Dünya Bankının Bakı nümayəndəliyində başlayacaq və fevralın 8-nə qədər davam etdiriləcək.
Layihəyə hazırlıq 2006-cı ilin əvvəlindən başlanıb. Yaponiya hökumətinin PHRD fondunun 900 min dollardan yüksək qrantı hesabına layihənin texniki-qtisadi əsaslandırılması üçün məsləhətçilər cəlb olunub.
Layihə dəmir yolu vasitəsilə sərnişin və yükdaşımalarının restrukturizasiyası və ADDY-nun maliyyə menecmentinin beynəlxalq standartlara uyğunlaşdırılmasını nəzərdə tutub.
Ticarətə və dəmiryol tranzitininə yardım layihəsi çərçivəsində ADDY -nun rəqabətə davamlılığı, effektliyinin yaxşılaşdırılması və kommersiya istiqamətinin yüksəldilməsi nəzərdə tutulub.
DB ilə Azərbaycan hökuməti arasında əməkdaşlıq strategiyasına əsasən (2007-10 il) dəmir yolu vasitəsilə tranzit və ticarətə yardım layihəsinə 80 milyon dolların ayrılması planlaşdırılır.
Bankın Direktorlar Şurasında onun təsdiqi iyunun sonuna qədər, 2007-ci maliyyə ilində gözlənilir. Kredit Beynəlxalq Rekonstruksiya və İnkişaf Bankının şərtləri əsasında ayrılacaq.
