Azərbaycan, Bakı/müxbir " İ.Xəlilova/Bu gün Milli Məclisdə Azərbaycan hökumətinin 2006-cı il hesabatı dinlənilib. Hesabatı təqdim edən baş nazir Artur Rəsizadə məlumat verib ki, üç il bündan əvvəl Azərbaycan iqtisadiyyatı iki həlledici xüsusiyyəti ilə xarakterizə olunan yeni keyfiyyət mərhələsinə qədəm qoyub. Birincisi, sosial-iqtisadi inkişafın uğurla davam etdirilməsi, ikincisi, iqtisadi və institusional islahatların dərinləşdirilməsidir.
O, Nazirlər Kabineti fəaliyyətinin əsasını təşkil edən istiaqmətləri sadalayıb. Bu vaxt ərzində ölkənin qeyri-neft sahəsinin inkişafı istiqamətində, regionlarda, sosial sahədə, infrastrukturun təkmilləşdirilməsi üçün kompleks tədbirlər həyata keçirilib. Ölkənin enerji təhlükəsizliyinin möhkəmləndirilməsi, yoxsulluq probleminin həlli və digər istiqamətlərdə tədbirlər həyata keçirilib.
ÜDM 2003-cü illə müqayisədə 1,4 dəfə, adambaşına düşən ÜDM isə 2,7 dəfə artıb. Əhalinin pul gəlirləri üç il ərzində 1,8 dəfə, orta aylıq əməkhaqqı 2 dəfə, sosial istiqamətli xərclər - 3 dəfə, investisiyalar - 7,8 dəfə, müdafiə xərcləri - 2,4 dəfə, büdcə xərcləri və gəlirlər 3 dəfədən çox artıb. Bu dövr ərzində ölkə iqtisadiyyatının inkişafına 14 mlrd. dollar investisiya qoyulub.
Nazirlər Kabinetinin hər kvartalda keçirilən geniş iclaslarında cari və strateji məsələlər müzakirə olunur, müxtəlif problemlərin həlli üçün konkret yollar müəyyən edilir və bu da 2006-cı ildə praktiki olaraq iqtisadiyyatın bütün istiqamətlərində böyük uğurların əldə olunmasına səbəb olub.
Ötən il ölkə üçün iqtisadi hadisələrlə - enerji təhlükəsizliyinin təminatı üçün dünyada böyük əhəmiyyətə malik olan Bakı-Tbilisi-Ceyhan boru kəmərinin istifadəsi və Bakı-Tbilisi-Qars dəmir yolunun tikintisi üzrə qəbul olunmuş qərarla tarixi il olub. Sosial-iqtisadi islahataların dərinləşdirilməsi nəticəsində 2006-cı ildə pensiya sisteminin yenidən formalaşdırılması çərçivəsində müvafiq normativ-hüquqi baza yaradılıb, ünvanlı sosial yardım tətbiq olunub, ilk dəfə olaraq ipoteka kreditlərinin verilməsinə başlanılıb, denominasiya prosesi də uğurla başa çatıb. Bununla yanaşı, uzun müddət davam edən Naxçıvan MR-in qazla təminat problemi də həll olunub.
2006-2010-cu illər üçün ətraf mühitin mühafizəsi və ölkədə ekoloji vəziyyətin yaxşılaşdırılması üçün Dövlət Proqramı təsdiqlənib və reallaşdırılmağa başlanılıb.
ÜDM-in real artımı ötən il 34,5 faiz, cari qiymətlərlə 17,7 mlrd. manat təşkil edib. Adam başına düşən əlavə dəyər 33 faiz artaraq 2400 dollara çatıb. Beynəlxalq maliyyə təşkilatları və bank strukturlarının təsdiqlədiyinə görə, Azərbaycan dinamik inkişaf edən ölkələr siyahısına daxil edilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
