Azərbaycan, Bakı/ Trend müxbir S.Əliyev/ Bakı-Tiflis-Qars dəmiryol xəttinin tikintisi layihəsi çərçivəsində Azərbaycan artıq Gürcüstana 50 mln. dollar verib. Bu barədə çərşənbə günü Azərbaycanın nəqliyyat naziri Ziya Məmmədov bildirib.
Hazırda Türkiyənin Yuksel Domonik şirkəti yolun Gürcüstan hissəsinin texniki-iqtisadi əsaslandırması (TİƏ) üzərində işləri davam etdirir (bu şirkət artıq yolun Türkiyə hissəsinin TİƏ-sini hazırlayıb). Mayın ortalarında yolun Gürcüstan hissəsinin texniki-iqtisadi əsaslandılma işləri başa çatdrırılacaq. Daha sonra tenderin elan ediləcəyi gözlənilir. Bu yolla bilavasitə tikinti işlərinin iyul ayında başlanacağı güman edilir.
Daha öncə Azərbaycan prezidenti "Yeni Bakı-Tiflis-Qars dəmir yolunun çəkilməsi layihəsi çərçivəsində tədbirlər barədə" Sərəncam imzalayıb. Bu sərəncama əsasən nəqliyyat naziri Ziya Məmmədovun rəhbərlik etdiyi Dövlət Komissiyası yaradılıb. Komissiyanın tərkibinə maliyyə, xarici işlər, iqtisadi inkişaf nazirliklərinin nümayəndələri, Dövlət Neft Fondunun, Dəmir Yolu və Beynəlxalq Bankın rəhbərləri daxildir.
Azərbaycan tərəfdən layihənin koordinatoru Nəqliyyat Nazirliyi təyin olunub. Nazirlik vasitəsilə Gürcüstana 200 mln. dollar kredit ayrılacaq. Bu vəsaitlər Azərbaycanın Dövlət Neft Fondundan sərf olunacaq.