Azərbaycan, Bakı /müx. " S.Babayeva/ Azərbaycanda mis və nikelin yeni ehtiytları aşkarlanıb. Bu barədə cümə günü Azərbaycanın ekologiya və təbii sərvətlər naziri Hüseyn Bağırov məlumat verib.
Onun sözlərinə görə, bu haqda Böyük Qafqazda aparılan geoloji-kəşfiyyat işlərindən sonra bəlli olub. Müvafiq işlərin aparıldığı ərazilərdə mis və nikelin yüksək dərəcədə qatlaşması aşkarlanıb.
Nazirin bildirdiyinə görə, Oğuz rayonu ərazisində qızıl yataqlarının mövcudluğu ehtimalı var. Bağırov deyib ki, bu gün həmin yataqların işlənilməsinə dair şirkətlərlə danışıqlar aparılır və konkret müqavilənin imzalanacağı istisna deyil.
Qeyd edək ki, Azərbaycanda qızıl yataqlarının işlənilməsi hüququna hökumətlə PSA tipli müqavilə imzalayan R.V. Investment Group Servies LLC şirkəti malikdir. Müqavilə Azərbaycanın cənub-qərbində altı yataqda işlərin aparılmasını nəzərdə tutur. Bunlar Gədəbəy, Ordubad, Qoşa Bulaq, Qızıl Bulaq, Vejnəli və Söyüdlü yataqlarıdır. Layihədə iştirakın 49 faizi RV Investment şirkətinə, 51 faizi isə Ekologiya və Təbii Sərvətlər Nazirliyi qismində Azərbaycan hökumətinə məxsusdur. Hələlik qızılın hasilatına başlanılmayıb.
Bağırovun sözlərinə görə, bu gün layihəni idarə edəcək komitənin formalaşdırılması ilə bağlı proses gedir.
"Komitə yaradıldıqdan sonra biz prosesə təsir etmək üçün daha konkret imkanlar əldə edəcəyik" - deyə o bildirib.
