Azərbaycan,Bakı/müxbir Trend E.Hüseynli/Azərbaycan Dövlət Dəmir Yolu respublika ərazisi üzrə sürət qatarının işə salınması layihəsinin reallaşdırılımasının iki variantını nəzərdən keçirir. Bu variantlardan biri mövcud yol infrastrukrunun istifadəsi ilə, ikincisi isə yeni yolun tikintisi ilə layihənin reallaşdırılmasıdır. Bu barədə cümə axşamı Azərbaycanın nəqliyyat nazirinin müavini Musa Pənahov məlumat verib.
Nəqliyyat Nazirliyi mövcud olan dəmir yollarının sürətini 150 km/saatadək artırmağı planlaşdırır. Bu layihə üzrə Azərbaycana bu yaxınlarda imzalanmış memorandum çərçivəsində Cənubi Koreyanın Tikinti və Nəqliyyat Nazirliyi yardım göstərəcək.
İlk növbədə, yenidənqurma Bakı-Böyük Kəsik-Gürcüstan sərhədi, daha sonra Yalama-Astara dəmir yolu sahəsində aparılacaq.
Azərbaycanın Nəqliyyat Nazirliyində hesab edirlər ki, Azərbaycan dəmir yollarının sürətinin artırılması TRACECA nəqliyyat dəhlizində raqəbət qabiliyyətini artırmağa imkan verəcək. Koreya məsləhətçilərinin qiymətləndirmələrinə əsasən, Bakı-Böyük Kəsik-Gürcüstan sərhədi dəmir yolu bu gün 30 km/saat sürətlə işləyir və yalnız bəzi sahələrdə 160 km/saat sürətə çatır. Azərbaycan nəqliyyatçıları birinci mərhələdə sürəti 80 km/saat artırmağı, daha sonra isə mütəmadi olaraq 160 km/saatadək artırmağı təklif edir.
Sürətli sərnişin qatarının işə salınması layihəsi uzunluğu 502 km olan Bakı-Böyük Kəsik (Gürcüstan sərhədi) marşrutu üzrə nəzərdə tutulur. Bu layihənin reallaşdırılması üçün yolun, energetika təsərrüfatının, siqnalizasiya və əlaqənin yenidən qurulması lazımdır. Bundan başqa, sürətli lokomotiv və vaqonlarının əldə olunması məsələsi də durur. Bu layihədə iştirak etməkdə Yaponiya, Koreya və Fransanın nəqliyyat strukturları maraqlıdır.
