Azərbaycan, Bakı /müx. Trend İ.Xəlilova/ Mayın sonunda Azərbaycan Brüsseldə Avropa Birliyi (AB) ilə ikitərəfli danışıqlar keçirməyi planlaşdırır. Müzakirələrin əsas mövzusu ölkəmizin Ümumdünya Ticarət Təşkilatına (ÜTT) üzvlüyü ilə bağlıdır. Bu barədə danışıqları aparan qrupdan məlumat veriblər. "Hazırda biz AB-dən danışıqların konkret tarixini gözləyirik. Danışıqların keçirilməsinə dair razılaşma diplomatik kanallarla Azərbaycanın Cenevrədəki missiyası tərəfindən əldə olunub" - deyə mənbə vurğulayıb.
Azərbaycanı xarici işlər nazirinin müavini Mahmud Məmmədquliyevin rəhbərlik etdiyi heyət təmsil edəcək. Buraya Dövlət Gömrük Komitəsi, İqtisadi İnkişaf və Kənd Təsərrüfatı nazirlikliklərinin nümayəndələri daxil olacaq.
AB ilə danışıqların əsas mövzusu mallar və xidmətlərlə bağlı şərtlərə aid olacaq.
"Bu vaxtadək ümumi məsləhətləşmələr aparılırdı. Ancaq ikitərəfli danışıqlarda AB-ni maraqlandıran məsələlərə dair konkret müzakirələr yer alacaq" - deyə danışıqlar qrupundan bildiriblər.
Bu gün artıq Oman, Gürcüstan və Moldova ilə danışıqlar başa çatıb. Bu ölkələr Azərbaycanın təkliflərini qəbul ediblər və müvafiq protokolları imzalamağa hazırdırlar. İmzalanma mərasimi 2007-ci ildə ÜTT üzvləri ilə danışıqların növbəti mərhələsində baş tuta bilər.
İkitərəfli danışıqlara hazırlıqla bağlı məsələləri artıq Türkiyə, ABŞ, Kanada, Avstraliya, Yaponiya və Çin göndərib. ABŞ-la Kanadanı lisenziyalaşdırma, tarif siyasəti, gömrük qanunvericiliyi, əqli mülkiyyət kimi məsələlər maraqlandırır. ÜTT ölkələri Azərbaycanın nə qədər liberal olduğunu və tarif siyasətinin şəffaflığını müəyyənləşdirmək istəyirlər.
ÜTT-nin qaydalarına görə idxal olunan və yerli mallar, habelə xidmətlər üçün vahid rejim tətbiq olunmalıdır. Konkret olaraq aksiz vergisi üzrə vahid dərəcələr müəyyənləşdirilməlidir.
Gömrük tarifləri daxili bazarın müdafiəsinin əsas vasitələrdən biridir. Buna görə də Nazirlər Kabinetində hesab edirlər ki, ölkə yerli istehsalçılar üçün maksimum şərait yaratmalıdır. AB və ABŞ-ın mövqeyi isə ondan ibarətdir ki, ÜTT-yə qəbul olunan ölkə gömrük tarifləri ilə bağlı üzərinə maksimum öhdəlik götürsün.
