Azərbaycan, Bakı / Trend / Azərbaycan, Gürcüstan və Türkiyə nümayəndələri Ankarada Bakı-Tiflis-Qars marşrutu üzrə dəmiryol xətti tikintisi layihəsini müzakirə ediblər. Bu barədə Azərbaycanın Nəqliyyat Nazirliyindən məlumat veriblər.
Tərəflər Azərbaycan, Türkiyə və Gürcüstana məxsus bütün qabaritli vaqonların Türkiyədən Avropaya və MDB ölkələrinə hərəkəti, həmçinin onların gecikmə dövrləri ilə bağlı məsələləri müzakirə ediblər.
Azərbaycan, Gürcüstan və Türkiyə dəmiryol şəbəkəsi və tərəflərə məxsus olan vaqonlarla bağlı tərəflər arasında texniki sənədlərin mübadiləsi olub.
İlin sonuna qədər Azərbaycan Bakı-Tiflis-Qars dəmiryol xətti layihəsi çərçivəsində Gürcüstana 50 mln. dollar verəcək. Hazırda isə Türkiyənin Yuksel Domanik şirkəti Bakı-Tiflis-Qars dəmiryol xəttinin bir hissəsini təşkil edən Gürcüstanın dəmir yollarının yenidən qurulması üzrə işlərin texniki iqtisdadi əsaslandırılmasını (TİƏ) davam etdirir. Bilavasitə tikinti işlərinə isə iyulda başlamaq planlaşdırılıb.
Bakı-Tiflis-Qars dəmiryol xəttinin tikintisi üzrə Azərbaycan tərəfdən koordinator Nəqliyyat Nazirliyi təyin olunub.
Nazirlik vasitəsilə Azərbaycan Gürcüstana kredit şəklində 200 mln. dollar ayırmağı planlaşdırıb. Bütün bu vəsait Dövlət Neft Fondundan ayrılacaq.