Azərbaycan, Bakı / Trend , müxbir İ.Xəlilova / Cənubi Koreya şirkəti "Di Es" Azərbaycan hökuməti üçün Bakı beynəlxalq ticarət limanının köçürülməsi layihəsinin ilkin qiymətləndirilməsini aparıb. Layihə 400 mln. dollar məbləğində dəyərləndirilib. Bu barədə Azərbaycan İqtisadi İnkişaf Nazirliyinin İnvestisiya siyasəti şöbəsinin müdiri Əsgər Ələkbərov məlumat verib.
"Araşdırmanın nəticələri ölkənin Nəqliyyat Nazirliyi ilə müzakirə olunub" - deyə Ələkbərov bildirib.
Yeni beynəlxalq ticarət limanının tikintisi layihəsinin maliyyələşdirilməsinə Koreya şirkətləri ilə yanaşı Avropa Yenidənqurma və İnkişaf Bankı və Yaponiya Beynəlxalq Əməkdaşlıq Bankı (JBIC) maraq göstərir.
Hökumətdə limanın tikintisi ilə bağlı bir neçə variant nəzərdən keçirilir. Qaradağ rayonunda Bakı limanının yerinin dəyişdirilməsi vasitəsilə yeni beynəlxalq ticarət limanının tikintisi (Ələt), Zığda isə kiçik quru mal limanının yaradılması təklif olunur. Burada yüklərin boşaldılması məqsədilə ekoloji təmiz, yəni yeyinti məhsulları və digər yüklü gəmilər üçün 3-4 yanalma sahəsi olacaq.
