Azərbaycan, Bakı, 06 avqust / Trend , müxbir S.İlhamqızı / Bakı-Tbilisi-Ceyhan neft kəmərinin Türkiyənin Ərzincan bölgəsindən keçən hissəsində baş vermiş partlayış nəticəsində 12 min barel xam neft yanıb. Bu barədə Türkiyənin "Cihan" Xəbər Agentliyi məlumat yayıb.
Qəza gecə saatlarında Ərzincan-Refahiyə yolunun 60-ci km-də, Yurtbaşı kəndi yaxınlığında baş verib. Partlayışın səbəbləri hələki məlum deyil. Yanğının 50 metr yüksəkliyə qalxdığı bildirilir.
Ərzincan Dövlət Hava Yollarına aid 2 yanğınsöndürən maşın, Ərzincan bələdiyyəsinə aid 1 yanğınsöndürmə briqadası, 3 su tankı, Refahiyə bələdiyyəsinə aid 2 yanğınsöndürən maşın, 1 ekskavator və bir buldozer hadisə yerinə gətirilib.
Ərzincanın Refahiyə Jandarmeriyasından Trend -a verilən məlumata görə, yanğının söndürülməsi üzrə işlər hələ də davam etdirilir.
Yanğının artıq 10 saatdır davam etdiyi bildirilir.