Azərbaycan, Bakı, 20 avqust/ Trend /Noyabrda "Neft Daşları" dəniz yatağı üçün "Neft Daşları - 2585" yeni dördbloklu platformanın tikintisi başlayacaq, ARDNŞ -nin çərşənbə günü yayılan məlumatında bildirilir. Hazırda Azərbaycan Dövlət Neft Şirkətinin (ARDNŞ) "Neftqazlayihə" İnstitutu yeni platformanın layihə-smeta sənədləşdirməsini hazırlayır.
Zığ tikinti - quraşdırma meydançasında platformanın iki blokunun tikintisini "Neftqaztikinti" tresti aparacaq. Digər iki blok Heydər Əliyev adına Bakı Dərin Özüllər Zavodunda tikiləcək.
Dəniz şəraitində yeni platformanın istismar müddəti 50 ildir. Yeni platforma suyun 46 metr dərinliyində, beşbloklu "Neft Daşları - 18- 87" platformasının 500 metrliyində yerləşdiriləcək. Yeni platformadan 12 quyu qazmaq planlaşdırılır.
Bu tədbirlər Azərbaycan Respublikası prezidentinin Neft-Qaz Çıxarma İdarəsində neftin 812 min tondan 1,2 mln. tonadək (1,5 dəfə) atrırılması ilə bağlı sərəncamı çərçivəsində həyata keçirilir. 2008 - ci ildə yataqdan ümumi neft hasilatı 936 min 420 ton təşkil edəcək. NQÇİ 2009 - cu ildə neft hasilatını 1 mln. 20 min tonadək artırmağı planlaşdırır.
ARDNŞ - nin geoloqlarının hesablamalarına görə, Neft Daşları" yatağında neft ehtiyatlarının qalıq həcmi 30 milyon ton təşkil edir. ARDNŞ yataqda neft hasilatının artırılması üçün 2010-cu ilədək daha 78 yeni quyu qazacaq.