Azərbaycan, Bakı, 11 sentyabr / Trend , müxbir İ.Xəlilova/ Asiya İnkişaf Bankının Direktorlar Şurası Azərbaycanda elektrik xətlərinin yaxşılaşdırılması ilə bağlı $160 mln. məbləğində kreditin ayırılmasını təsdiq edib, - cümə axşamı bankın Bakı nümayəndəliyindən bildiriblər. Layihənin ümumi dəyəri $220 mln. təşkil edir.
Layihə çərçivəsində Mingəçevir su elektrik stansiyasından Abşeron yarımstansiyasınadək 220 kV ikikonturlu elektrik ötürücüsünün tikilməsi nəzərdə tutulub. Bununla yanaşı, 220/110 kV yarımstansiyasının 110 kV elektrik ötürücüsü ilə birləşdirilməsi palnlaşdırılıb.
Layihənin əsas məqsədi - elektrik ötürücü sistemlərin gücünün artırılması, iqtisadi artımda adekvat və etibarlı enerji təminatı vasitəsilə regional qeyri-bərabərliyin azaldılması, enerji ötürücülərinin imkanının genişləndirilməsi, keyfiyyətin yaxşılaşdırılması və enerji təminatının etibarlığıdır.
İyulda Asiya bankı ölkə hökuməti ilə kredit razılaşması üzrə danışıqlar aparıb. Razılaşmaya əsasən, Azərbaycana kredit vəsaitləri 25 il müddətinə beş illik güzəştlə və libor+0,2 faiz dərəcəsi ilə veriləcək.
Asiya İnkişaf Bankı ilə Azərbaycan 1999-cu ildən əməkdaşlıq edir və hazırda bank dövlət zəmanəti əsasında ölkə üçün $304 mln. məbləğində krediti təsdiq edib.
Sentyabrın 11-nə rəsmi valyuta məzənnəsi 0,8159 AZN/USD-dır.
