Azərbaycan, Bakı, 17 yanvar/ Trend / Azərbaycan Nazirlər Kabinetinin 2008-ci ilin sosial-iqtisadi yekunlarına həsr olunan və Azərbaycan prezidenti İlham Əliyevin sədrliyi altında keçən iclasında iqtisadi inkişaf naziri Şahin Mustafayev bildirib ki, 2008-ci ildə Azərbaycanda ölkənin tarixi ərzində rekord həcmdə neft - 44,5 mln. ton (kondensat daxil olmaqla) hasil olunub ki, bu da 2007-ci ilin göstəricisindən 4,6 faiz çoxdur.
Mustafayev bildirib ki, 2008-ci ildə Azərbaycan 16,3 mlrd. kubmetr qaz əldə edib ki, bu da 2007-ci ilin göstəricisindən 50,4 faiz çoxdur.
2009-cu il ərzində Azərbaycanda neft hasilatı həcmi 57 mln. tondan artıq həcmdə proqnozlaşdırılır. Neft hasilatının ümumi həcmindən 48,5 mln. tonu Azərbaycan Beynəlxalq Əməliyyat Şirkəti tərəfindən "Azəri-Çıraq-Günəşli" yataqları blokundan hasil ediləcək. Neftin qalan həcmi, yəni təqribən 8,6 mln. tonu şəxsi yataqlarından neft hasil edən SOCAR şirkətinin (Azərbaycan Dövlət Neft Şirkəti) payına düşəcək.
2009-cu ildə Azərbaycanda qaz hasilatı həcmi 30 mlrd. kubmetr həcmində proqnozlaşdırılır. Qazın ümumi həcminin doqquz mlrd. kubmetri xarici şirkətlər konsorsiumu tərəfindən işlənən "Şahdəniz" qaz kondensat yatağından, səkkiz mlrd. kubmetri SOCAR şirkəti tərəfindən şəxsi yataqlardan hasil ediləcək. Qazın qalan həcmi səmt qazının hasil edildiyi "Azəri-Çıraq-Günəşli" yataqları blokunun payına düşəcək. Bu qazın bir hissəsi təzyiqi saxlamaq üçün laylara vurulur, bir hissəsi isə SOCAR şirkətinə pulsuz verilir.
