Azərbaycan, Bakı, 19 yanvar/ Trend /
2008 - ci ildə Azərbaycanın daxili bazarına 4,7 mln. tondan çox neft məhsulları göndərilib ki, bu da 2007- ci ilin göstəricisindən 0,5 faiz azdır. Bu barədə ölkənin Dövlət Statistika Komitəsindən məlumat veriblər.
Neft məhsullarının ümumi həcmindən 930 min ton avtomobil benzininin payına düşüb və 2007- ci ilin göstəricisini 16,7 faiz qabaqlayır. Azərbaycanın daxili bazarında 1 ton A - 92 markalı benzinin topdansatış qiyməti (təchizata çəkilən xərclər və ƏDV nəzərə alınmaqla) 670 manat, A - 95 markalı benzinin qiyməti 736 manatdır. Dövlət Statistika Komitəsinin məlumatlarına əsasən, 2008 - ci ildə Azərbaycanın Azpetrol şirkəti realizəyə 478,95 min, LUKoil 143,22 min tondan çox avtomobil benzini alıb.
Daxili bazarda ən çox dizel yanacağı realizə edilib; 2008 - ci ildə 1 mln. ton dizel yanacağı satılıb ki, bu da 2007- ci ildən 38,7 faiz çoxdur. Azərbaycanın daxili bazarında 1 ton dizel yanacağının qiyməti (təchizata çəkilən xərclər və ƏDV nəzərə alınmaqla) 485 manatdır. Dövlət Statistika Komitəsinin məlumatına görə, Azpetrol bu həcmdən təxminən 330,4 min ton, LUKoil 110,1 min tondan çox, Xəzər Dəniz Gəmiçiliyi 18 min ton çox dizel yanacağı əldə edib.
2008 - ci ildə 924,8 min ton mazut satılıb ki, bu da 2007 - ci ilin göstəricisindən 50,8 faiz azdır. Azərbaycanın daxili bazarında 1 ton M - 40 mazutun qiyməti (təchizata çəkilən xərclər və ƏDV nəzərə alınmaqla) 100 manatdır. Dövlət Statistika Komitəsinin məlumatına əsasən, Azenerji SC təxminən 464,25 min ton, Heydər Əliyev adına Bakı Neft Emalı Zavodu isə, sonradan emal edilmək üçün təxminən 348 min ton mazut alıb.
İl ərzində 534,3 min ton aviasiya kerosini satılıb ki, bu da 2007 - ci ilin göstəricisindən 9,9 faiz çoxdur. Azərbaycanın daxili bazarında 1 ton aviasiya kerosini (təchizata çəkilən xərclər və ƏDV nəzərə alınmaqla) 307 manatadır.
Ötən il daxili bazarda 190,4 min ton neft bitumu satılıb. Bu, 2007- ci ildən 22 faiz çoxdur. Azərbaycanın daxili bazarında BN 60/90 markalı bitumun 1 tonunun (təchizata çəkilən xərclər və ƏDV nəzərə alınmaqla) qiyməti 160 manatdır.
2008 - ci ildə daxili bazarda 120,9 min ton maye neft qazı (LPG) satılıb -- 2007- ci ildən 3,3 faiz az.
Daxili bazarda 1 mln. tondan çox həcmdə digər neft məhsulları satılıb və bu, 2007- ci ilin göstəricisindən 74,5 faiz çoxdur.
