Azərbaycan, Bakı, 29 yanvar/ Trend / 2009-cu ildə SOCAR (Azərbaycanın Dövlət Neft Şirkəti) əsaslı tikintiyə 2008-ci ildəki 836,5 mln. manata qarşı təxminən 1,2 mlrd. manat ayırıb, - SOCAR-ın məlumatında deyilir.
2008-ci ildə 262 km magistral qaz kəmərləri ( 127 km sualtı, 135 km quruda olmaqla) istismara verilib ki, bu da bu da təbii qazın ölkənin bütün bölgələrinə nəqlini, eləcə də "Şahdəniz" yatağından hasil edilən artan qaz həcmlərinin yeraltı qaz anbarlarına yığılmasını təmin edib.
Son 3 ildə SOCAR qaz hasilatını 2 dəfə - 3,9 milyard kubmetrdən 7,75 milyard kubmetrədək artırıb.
2008-ci ildə Bahar-Hövsan-Suraxanı qaz kəmərinin inşası başa çatrılıb. Sualtı hissəsinin uzunluğu 32 km, quru hissəsinin uzunluğu 9,5 km olan kəmərin ötürmə qabiliyyəti sutkada 5 milyon kubmetrdir. Qaz kəməri "Günəşli" yatağından hasil edilən qazın "Şimal" elektrik stansiyasına, eləcə də Bakının ətraf rayonlarının əhalisinə və sənaye müəssisələrinə nəqli üçün nəzərdə tutulub. Bu günlərdə kəmərdə sınaq işləri başa çatdırılacaq və o istismara veriləcək. 2009-cu ildə "Günəşli" yatağında ümumi uzunluğu 15- 20 km olan 8 və 9-cu platformaları birləşdirəcək qaz kəmərinin çəkilməsi planlaşdırılır.
Apreldə "Neft Daşları" dəniz yatağındakı 2 saylı Sıxıcı-Kompressor Stansiyasının (SKS-2) gücünün sutkada 11 milyon kubmetr qazadək artırılması üzrə işləri başa çatırmaq planlaşdırılır. Artıq lazımi avadanlıq alınaraq Bakıya gətirilib və yaxın vaxtlarda onun quraşdırılması nəzərdə tutulur.
Hazırda stansiyanın sutkalıq gücü 7,4 milyon kubmetr təşkil edir. Nəzərdə tutulmuş işlər aparıldıqdan sonra onun gücü 3,6 milyon kubmetrədək artacaq. Hazıda stansiyada 12 aqreqat işləyir. Lakin stansiyaya profilaktik baxış zamanı işə salına biləcək ehtiyat aqreqatlar yoxdur. Məhz bu səbəbdən stansiyanın gücünün artırılması barədə qərar qəbul edilib.
Stansiya "Günəşli" və "Çıraq" yataqlarından gələn aşağı təzyiqli səmt qazının sıxılması üçün nəzərdə tutulub. Stansiyaya daxil olan aşağı təzyiqli qaz (5 atmosfer) 55 atmosferədək sıxılır.
Eyni zamanda, "Günəşli" yatağındakı 4 nömrəli platformada kompressor stansiyasının inşası başa çatdırılmalıdır. Bu aşağı təzyiqli qazı atmosferdən yığmağa imkan verəcək. Stansiyanın gücü sutkada 2 milyon kubmetrdir. Bu, bahalı qazma işləri aparılmadan əlavə qaz həcmlərinin əldə edilməsi deməkdir.
Bundan başqa, 2009-cu ildə qaz-lift kompressor stansiyasının yenidən qurulması və onun sıxım gücünün 100 atmosferə çatdırılması planlaşdırılıb. Köhnə yataqlardakı laylardan neftin çıxarılması üçün ora yüksək təzyiqli qazın vurulması tələb olunur.
Qaradağ qaz anbarının genişləndirilməsi üzrə işləri də başa çatdırmaq planlaşdırılır. Işləri qış mövsümü üçün yanacağın yığılması dövrünə (aprel) istismara vermək nəzərdə tutulur. Burada sutkalıq tutumu 7 milyon kubmetr və təzyiqi 160 atmosfer olan 5 motokompressor aqreqatından ibarət iri kompressor stansiyasın qurulması üzrə iş aparılır.
Apreldə perspektivli "Ümid" qaz strukturunda kəşfiyyat xarakterli qazma işlərinin aparılması üçün "Ümid- 1" platformasının qazmaçılara verilməsi də planlaşdırılır. Platformanın hər iki bloku artıq suyun 58 metr dərinliyində quraşdırılıb. Bütün üst qurğular, habelə qazma avadanlıqları yaxın aylarda hazır vəziyyətdə platformaya gətiriləcək.
2009-cu ilin iri obyektlərindən biri də "Günəşli" yatağı üçün inşa edilən və hündürlüyü 92 metr olan ikibloklu texnoloji platformadır. Bloklardan biri Heydər Əliyev adına Bakı Dərin Özüllər Zavodunda, digəri isə "Neftqaztikinti" trestinin Zığdakı sahəsində yığılacaq.
Bu platformada "28 May" Neft-Qaz Çıxarma İdarəsinin (NQÇİ) neft hasilatının qaz-lift sistemi cəmlənəcəkdir. Bundan əlavə, 2009-cu ildə "Neft Daşları" NQÇI üçün hər biri 12 quyuluq 2 platformanın inşası nəzərdə tutulub. Onlardan biri (2415 nömrəli) platforma artıq dənizin 23 metr dərinliyində quraşdırılıb. Hazırda modulların avadanlıqla təchiz edilməsi həyata keçirilir. İkinci platforma (2521) hələ tikilir.
2009-cu ildə "Neft Daşları" yatağında estakadaların və digər hidrotexniki qurğuların təmirinə 10 milyon manatdan çox, sualtı boru kəmərlərinin təmirinə isə 1,4 milyon manat vəsait ayrılıb.
