Azərbaycan, Bakı, 07 aprel / Trend , müxbir V.Şərifov /
Azərbaycanın "Şahdəniz" yatağının işlənməsi üzrə tərəfdaşlara daha yaxşı iqtisadi nəticə əldə etmək üçün layihə üzrə "Mərhələ-2" çərçivəsində hasil ediləcək qazın satışı üçün daha cəlbedici bazarlar seçməsi vacibdir. Bu barədə StatoilHydro Azerbaijan şirkətinin prezidenti Kristian Hausken hesab edir. StatoilHydro "Şahdəniz" layihəsinin birinci mərhələsi çərçivəsində qaz marketinqi ilə məşğul olan Azerbaijan Gas Supply Company-yə operatorluq edir.
"Biz qazın gedə biləcəyi bütün marşrutları və onların potensial uzunmüddətli gəlirliliyini nəzərdən keçiririk. Qaz marşrutları Cənubi Qafqaz boru kəməri ilə qərbdə Türkiyəyə, şimalda Rusiyaya və ya cənubda İrana gedə bilər", - deyə Hausken bildirib.
Azərbaycan hökumətinin proqnozlarına əsasən, bu il "Şahdəniz" yatağında hasilat həcmi əvvəllər proqnozlaşdırılan ən yüksək həcm - 8,6 mlrd. kubmetrə nisbətdə 9 mlrd. kubmetr qazı ötəcək. Növbəti illərdə hasilat həcmi 9,6 mlrd. kubmetr qaza çatacaq.
"İkinci mərhələdə əldə olunacaq qaz daha cəlbedici bazarlara göndəriləcək", - deyə Hausken bildirib.
Azərbaycanda "Şahdəniz" qaz kondensat yatağının işlənməsi üzrə birinci mərhələ çərçivəsində ümumi qaz hasilatı həcmi 180 mlrd. kubmetr təşkil edəcək.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz.
Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Layihənin birinci mərhələsi çərçivəsində qaz Cənubi Qafqaz boru kəməri ilə Türkiyə və Gürcüstana nəql olunur. Azərbaycan da qaz alıcısı qismində çıxış edir.
Məqalə müəllifi ilə əlaqə ünvanı: [email protected]