Azərbaycan, Bakı, 12 may / Trend /
Azərbaycan və Polşa arasında iqtisadi əməkdaşlıq məsələləri, o cümlədən enerji təhlükəsizliyi, sənaye, kənd təsərrüfatı, turizm, nəqliyyat və maliyyə-bank sahələri də daxil olmaqla, sənaye və energetika naziri, iqtisadi əməkdaşlıq üzrə Azərbaycan-Polşa hökumətlərarası komissiyanın həmsədri Natiq Əliyevin rəhbərliyi altında Azərbaycan nümayəndə heyətinin Varşavaya səfəri zamanı müzakirə ediləcək.
Səfər çərçivəsində Azərbaycan nümayəndə heyəti hökumətlərarası komissiyanın növbəti müşavirəsində iştirak edəcək.
Hökumətlərarası müşavirənin yekununda iqtisadi əməkdaşlıqla bağlı protokol imzalanacaq.
Azərbaycan nümayəndə heyətinə hökumətlərarası komissiyanın üzvləri, Xarici İşlər, İqtisadi İnkişaf, Maliyyə, Mədəniyyət və Turizm, Kənd Təsərrüfatı, Səhiyyə nazirliklərinin və Mərkəzi Bankın rəhbər şəxsləri daxildir. Azərbaycanın Polşadakı səfiri də nümayəndə heyətinin tərkibindədir.
