Azərbaycan, Bakı, 04 iyun / Trend , müxbir E.İsmayılov /
"Bakı-Novorossiysk kəməri ilə Azərbaycan neftinin nəqli tariflərinin dəyişdirilməsi dövlət başçılarının müstəsna hüququdur", - SOCAR-ın sərmayə və marketinq üzrə birinci vitse-prezidenti Elşad Nəsirov deyib.
"Hər hansı qətnamənin imzalanması yalnız saxlanmanın, nəqlin, itkilərin texniki xarakteristikasını dəyişə bilər. Tarif isə Azərbaycan və Rusiya prezidentləri bu müqaviləni dəyişənə qədər dəyişməz olaraq qalacaq", - SOCAR nümayəndəsi bildirib.
1996-cı ildə bağlanmış hökümətlərarası müqaviləyə əsasən, oradakı şərtlər tərəflərdən birini qane etmirsə, tranzit müqaviləsinə əsasən qane olmayan tərəf yarım il əvvəldən nota təqdim etməlidir.
Nəsirov, Rusiya enerji nazirinin SOCAR və "Transneft"in neft tədarük qrafiki üzrə texniki müqavilənin imzalanması haqqında razılığa gəlməsini bildirməsinə şərh verərkən deyib ki, bu, tranzit müqaviləsinin dəyişdirilməsi deyil. "Bu, əvvəllər "Transneft" və ABƏŞ arasında bağlanmış neft nəqli haqqında texniki müqaviləyə dəyişiklikdir", - vitse-prezident bildirib.
Bakı-Novorossiysk kəməri ilə Azərbaycan neftinin nəqli haqqında hökümətlərarası müqavilə 1996-cı ilin 18 yanvarında bağlanılıb. 1 ton neftin nəqlinə görə müəyyən edilən tarif 15,67 dollar təşkil edir.
Bakı-Novorossiysk kəməri ilə bu ilki neft nəqlinin həcmi 2,5 milyon tondur. Müqaviləyə əsasən bu rəqəm artıq 5 milyon tona çatmalı idi.
Bakı-Novorossiysk boru kəmərinin operatoru qismində 2007-ci ilə qədər Azərbaycan Beynəlxalq Əməliyyat Şirkəti (ABƏŞ) çıxış edirdi. Sonradan qurum bu səlahiyyətləri SOCAR-a verib. Üstəlik, ARDNŞ nümayəndələri qeyd edir ki, ABƏŞ üzrə tərəfdaşlar ümumiyyətlə bu marşrutla gələcəkdə neft nəql etmək niyyətində deyildi. Ancaq Gürcüstanda ötən ilin avqustunda baş verən hadisələr üzündən ABƏŞ üzrə tərəfdaşlar (BTC layihəsinin iştirakçıları) bu marşrutla nəqli bərpa etməli oldu.
Bakı-Novorossiysk boru kəməri ilə neft nəqli zamanı SOCAR çıxışda (Novorossiysk limanında) "Urals" markalı neft əldə edir ki, buna da səbəb başqa istehsalçıların nefti ilə qarışmadır. Ancaq Azərbaycan neftinin bu marşrutla nəqlinin həcminin artırılması halında Rusiya tərəfinin Novorossiyskdə keyfiyyət bankının qurulması məsələsini nəzərdən keçirməsi planlaşdırılır.
Məqalə müəllifi ilə əlaqə ünvanı: [email protected]
