Azərbaycan, Bakı, 18 dekabr / Trend , müxbir N.İsmaylova/
Rusiyanın Həştərxan vilayəti Azərbaycanın yod hasilatı və enerjiyə qənaət sahəsindəki təcrübəsini öyrənmək niyyətindədir. Bu barədə Həştərxan vilayətinin sənaye və təbii sərvətlər naziri Yuriy Maxoşvili deyib.
"Bizi maraqlandıran bir sıra layihələr var, çünki Azərbaycan tərəfi bu kimi layihələrin işlənməsində zəngin təcrübəyə malikdir. Bunlardan biri də yaxın il yarım ərzində reallaşdırmağa hazırlaşdığımız Həştərxan vilayətində qrunt sularından yod istehsalı layihəsidir. Azərbaycanda artıq 40 ildir ki, yod istehsalı sahəsində iş aparılır və azərbaycanlı mütəxəssislərin bu sahədəki təcrübəsi bizim üçün faydalı ola bilər", - Maxoşvili deyib.
Onun sözlərinə görə, Həştərxan vilayəti xammal və təkrar emal hissəsinə dair Bakı zavodlarının təcrübəsində də maraqlıdır və bu çox faydalı ola bilər.
"Bununla yanaşı, Həştərxan və Azərbaycan arasında elektik enerjisi, enerjiyə qənaət sahəsində böyük işlər var, çünki külək enerjisini daha səmərəli istifadə etmək lazımdır", - o deyib.
