Azərbaycan, Bakı, 25 iyun /Trend, müxbir S.Süleymanov /
70-dən artıq şirkət Qazaxıstan neftinin Azərbaycan ərazisindən nəqli üçün nəzərdə tutulan Transxəzər layihəsinin texniki-iqtisadi əsaslandırılmasının (TİƏ) işlənməsi ilə bağlı müsabiqədə iştirakda maraqlıdır. Bu barədə cümə günü ARDNŞ-nin (Azərbaycan Respublikası Dövlət Neft Şirkəti) Qazaxısxtandakı nümayəndəliyinin rəhbəri Vurğun Cəfərov bildirib.
"İndiyədək 70-dən artıq şirkət müsabiqədə iştiraka maraq göstərir", - Cəfərov deyib.
Bundan əvvəl ARDNŞ və "QazMunayQaz"ın törəmə müəssisəsi olan "QMQ-Transxəzər" TOO Transxəzər layihəsinin texniki-iqtisadi əsaslandırılmasının (TİƏ) işlənməsi üçün podratçının seçimi üzrə müsabiqə elan edib.
Müəyyən olunmuş müddətə görə, ərizələr iyulun 14-dək qəbul olunacaq. Qəbul müddəti başa çatdıqdan sonra ərizələr açılacaq və tərkibində ARDNŞ və QMQ-nin mütəxəssislərinin olduğu komissiya tərəfindən öyrəniləcək.
Transxəzər layihəsi "Bakı-Tbilisi-Ceyhan" neft kəməri üzrə Azərbaycan ərazisi vasitəsilə və Azərbaycan-Gürcüstan nəqliyyat marşrutu üzrə Aralıq dənizinə və Qara dənizə çıxışla neftin Qazaxıstandan nəql edilməsi üçün təsis edilir.