Azərbaycan, Bakı, 9 iyul /Trend, müxbir E.İsmayılov/
ARDNŞ "Qalmaz-Astara" yeni qaz kəmərinin tikintisi layihəsi çərçivəsində texniki-iqtisadi əsaslandırmanın (TİƏ) hazırlığı üzrə işlər aparır. Bu barədə cümə günü ARDNŞ-dəki mənbə bildirib. Yeni qaz kəmərinin uzunluğu 360 km olmalıdır.
"Hazırda cənub istiqamətində yeni qaz kəmərinin TİƏ-nin hazırlanması üzrə işlər görülür", - mənbə deyib.
Onun sözlərinə görə, hazırda ARDNŞ İrana Azərbaycan qazının nəqli həcminin artırılması çərçivəsində qaz-kompressor stansiyasının gücünün genişləndirilməsi üzrə işləri davam etdirir. "Azərbaycandan İrana gedən qaz kəmərinin bərpası işləri hələ ki başlamayıb", - mənbə qeyd edib.
Azərbaycan və İran arasında qaz nəqli infrastrukturunun yenidən qurulması nəticəsində qaz nəqlinin həcmi sutkada indiki 1,2 milyon kubmetrdən 3-3,5 milyon kubmetrədək artacaq.
İran ildə 5 milyard kubmetrədək Azərbaycan qazı almağa hazırdır. Bu barədə əvvəllər bu ölkənin nümayəndələri deyib.
Əvvəllər ARDNŞ prezidenti Rövnəq Abdullayevin dediyi kimi, cənub istiqamətində qaz nəqli infrastrukturunun yenidən qurulması üzrə işlərin cari ilin payızında başa çatdırılması planlaşdırılıb. Eyni zamanda, Azərbaycan qazının İrana tədarükü üzrə uzunmüddətli sazişin imzalanması da planlaşdırılıb.
Hazırda Azərbaycan Naxçıvan Muxtar Respublikasını qazla təchiz etmək üçün (sutkada 1-1,2 milyon kubmetr) İrana qaz nəql edir.
Azərbaycan və İranı ümumi uzunluğu 1474,5 kilometr - 296,5 kilometri Azərbaycan ərazisində yerləşən "Qazı Məhəmməd-Bind-Biand" qaz kəməri əlaqələndirir. Bu boru kəmərinin layihə üzrə ötürücülük qabiliyyəti ildə 10 milyard kubmetr təşkil edir. Bu marşrut 1971-ci ildə istismara verilən "Qazax-Astara-İran" boru kəmərinin qoludur. Bu istiqamətdə üç kompressor stansiyası - Qazı Məhəmməd, Ağdaş və Qazax stansiyaları tikilib. Qaz nəqliyyatı sistemi 55 atmosfer təzyiqi gücündə nəzərdə tutulub. Boru kəmərinin diametri 1200 millimetrdir.
