Azərbaycan, Bakı, 10 avqust /Trend, müxbir E.İsmayılov/
bp şirkəti "Chirag oil project" ("Azəri-Çıraq-Günəşli" yataqları blokunda neft hasilatının artırılması) çərçivəsində bu ilin ikinci rübündə dayaq bloku üçün əvvəllər müəyyən edilmiş meydanda qabaqlayıcı qazmanı davam etdirməyi planlaşdırır. Bu barədə bp-nin rəsmi hesabatında deyilir. İşlər "Dədə Qorqud" qazma qurğusu ilə həyata keçirilir.
Dayaq blokunun quraşdırılması üzrə işlər iyunun 21-də başa çatıb. Platforma 12 quyunun qazılması üçün nəzərdə tutulub.
Hesabatda deyildiyi kimi, ikinci rübdə birinci qabaqlayıcı J-01 quyusunun qazılmasına başlanılacaq. Eləcə də geotexniki quyunun qazılması üzrə işlər artıq başa çatıb.
İlin ikinci yarısında bu layihə çərçivəsində nəqletmə və quraşdırma (3-cü rüb), sualtı boru kəmərlərinin örtülməsi üzrə xidmətlərin göstərilməsi (3-cü rüb), boru kəmərlərinin quraşdırılması və dalğıc xidmətlərinin göstərilməsi (3-cü rüb) üzrə əsas müqavilələrin imzalanması planlaşdırılıb. Eləcə də bu il dayaq blokunun quraşdırılması (4-cü rüb) və ilk iri avadanlıqların Bakıya gətirilməsi (4-cü rüb) nəzərdə tutulub.
Layihə yeni "Qərbi Çıraq" platformasının inşasını nəzərdə tutur. Platforma dənizin 170 metr dərinliyində artıq fəaliyyət göstərən "Çıraq" və "Günəşli" hasilat platformalarının arasında quraşdırılacaq. "Chirag oil project" çərçivəsində inşaat işlərinin əksəriyyəti, o cümlədən, platformanın qazma modulunun inşası Azərbaycanda həyata keçiriləcək. Əvvəlki layihələr üçün modul xaricdə inşa edilib.
"Chirag oil project" altı milyard dollar məbləğində sərmayəni nəzərdə tutur.
"Azəri-Çıraq-Günəşli"də neft hasilatının artırılması çərçivəsində tikiləcək yeni platformadan "Azeri Light" növlü neftin hasilatının sutkalıq həcminin 183 min barel təşkil edəcəyi planlaşdırılıb. Yeni platformadan sutkada 6,5 milyon kubmetr qazın hasil ediləcəyi gözlənilir. Platformada sutkalıq qaz vurulmasının həcminin, təxminən, 2,3 milyon kubmetr olacağı nəzərdə tutulub.
Layihə çərçivəsində qabaqlayıcı qazma işləri 2010-cu ilin ikinci, 2012-ci ilin birinci dövrünü əhatə edəcək. Qazma işləri "Dədə Qorqud" qurğusundan həyata keçiriləcək. Platformadan hasilat 2013-cü ilin sonuna planlaşdırılıb.
Layihənin realizəsi çərçivəsində (AÇG üzrə müqavilənin 2024-cü ilədək qüvvədəolma müddəti) ümumilikdə 300 milyon barel neftin hasil edilməsi planlaşdırılıb.
"Azəri-Çıraq-Günəşli" layihəsinin iştirakçıları aşağıdakılardır: bp (operator - 34,1367 faiz iştirak payı), "ChevronTexaco" (10,2814 faiz), ARDNŞ (10 faiz), INPEX (10 faiz), "Statoyl" (8,5633 faiz), "ExxonMobil" (8,006 faiz), TPAO (6,75 faiz), "Devon Energy" (5,6262 faiz), "Itochu" (3,9205 faiz), "Delta Hess" (2,7213 faiz).
