Azərbaycan, Bakı, 20 avqust /Trend/
ARDNŞ-in (Azərbaycan Dövlət Neft Şirkəti ) Ekologiya İdarəsi Kompleks Qazma İşləri Trestinin "Bulla-dəniz", "Ələt-dəniz" və "8 Mart" yataqlarındakı obyektlərində monitorinq aparıb. Bu barədə idarənin cümə günü yaydığı məlumatda deyilir.
Monitorinq qazma zamanı ətraf mühitin mühafizəsinin qanunvericiliyə uyğunluğu, qazma işləri zamanı istifadə olunan texnoloji qurğularda ekoloji təhlükəsizliyin təmin olunmasının və s. müəyyən edilməsi məqsədilə keçirilib.
Məlum olduğu kimi, qazma zamanı istifadə olunan məhlullar və onların bəzi elementləri ətraf mühitə və dənizdəki canlılara mənfi təsir göstərir. Yuxarıda qeyd olunan obyektlərin dənizdəki stansiyalarının təsir mexanizmlərinin öyrənilməsi üçün sudan, planktondan və dənizin dibindən nümunələr götürülüb.
Eləcə də monitorinq zamanı qazma zamanı yaranan tullantıların idarə edilməsi sistemi, dənizdəki axınların sürəti və istiqaməti öyrənilib, ərazinin meteoroloji tədqiqatları aparılıb.
Laboratoriya analizlərindən sonra əldə olunacaq nəticələr əsasında, ekoloji tədbirlərin keçirilməsi üzrə təlkiflərin hazırlanması planlaşdırılır.
