Azərbaycan, Bakı, 30 sentyabr /Trend, müxbir E.İsmayılov/
"Hungarian Electricity Works" (MVM) Dövlət Şirkəti Azərbaycanın maye qazının Gürcüstan və Qara dəniz vasitəsilə Rumıniya və Mərkəzi Avropanın digər ölkələrinə nəqlini nəzərdə tutan "Azerbaijan-Georgia-Romanian Interconnector" (AGRI) layihəsinin hazırlanması üçün yaradılan layihənin fəaliyyətinə qoşulacaq. Bu barədə Macarıstan KİV yazır.
Layihə şirkətində 25 faizlik pay sahibləri "MVM", Rumıniyanın "Romgas" şirkəti, Gürcüstanın Neft-Qaz Korporasiyası (GOGC) və ARDNŞ olacaq.
Layihə şirkətinin fəaliyyətinin əsas məqsədi AGRI layihəsi üçün texniki-iqtisadi əsaslandırmanın (TİƏ) hazırlanmasından ibarət olacaq. Tədqiqatlar müsbət nəticə verəcəyi təqdirdə, layihənin həyata keçirilməsi üçün xarici investisiyaların cəlb edilməsi məqsədilə addımlar atılacaq.
Bundan əvvəl Azərbaycan sənaye və energetika naziri Natiq Əliyevin dediyi kimi, birgə müəssisə Buxarestdə fəaliyyət göstərəcək. Birgə müəssisə texniki-iqtisadi əsaslar və lazımi investisiyaların axtarışı üzrə hazırlıq işlərini nizamlamaqla məşğul olacaq.
Nazirin sözlərinə görə, layihənin gücü üç variantda nəzərdə tutulur - ildə iki milyard kubmetr qaz, beş milyard kubmetr və səkkiz milyard kubmetr. İlkin məlumatlara görə, layihənin gücündən asılı olaraq, onun dəyəri 1,2 milyardla 4,5 milyard avro arasında dövr edir.
Sentyabrın 14-də Bakıda Azərbaycan, Gürcüstan, Rumıniya və Macarıstan AGRI layihəsi üzrə Bakı Bəyannaməsini imzalayıblar.
Layihə Azərbaycan qazının Gürcüstanın Qara dəniz sahilində qaz kəməri üzrə nəqlini nəzərdə tutur ki, bu qaz da xüsusi terminalda mayeləşdirilərək, tankerlərlə Rumıniyanın Konstansa limanı terminalında nəql olunacaq. Gələcəkdə maye qaz təbii qaz halına gətirilərək, Rumıniya və digər Avropa ölkələrinin qaz tələbatını ödəmək üçün istiqamətlənəcək.