Türkmənistan, Aşqabad, 27 dekabr /Trend, müxbir H.Həsənov/
Türkmənistan Türkmənbaşı, Seydi şəhərlərindəki NEZ-lərinin və Nayipdəki qaz emalı kompleksinin istehsalı olan 320 min tona yaxın neft məhsullarını Dövlət Əmtəə-Xammal Birjasında hərraca çıxarıb.
Müxtəlif istiqamətlərə göndərilmək üçün nəzərdə tutulan 25 min ton maye qaz, 50 min ton benzin, 100 min ton dizel yanacağı, 80 min ton mazut, 65 min ton kerosin hərraca çıxarılıb.
Ötən həftə Türkmənistanın Dövlət Əmtəə-Xammal Birjasında keçirilən hərraclarda 31 əqd qeydə alınıb. BƏƏ, Virgin adaları, İran və Danimarkadan olan şirkətlər dizel yanacağı, baza yağı alıblar. Birjadakı sövdələşmələrin, o cümlədən neft məhsulları üzrə əqdlərin ümumi məbləği 57 milyon ABŞ dollarından artıq olub.
Bu birjada ənənəvi əsas alıcılar Azərbaycan, Əfqanıstan, Rusiya, Kanada, Qazaxıstan, Türkiyə, İsveçrə və digər ölkələrdir.
Əmtəə-Xammal Birjası Türkmənistanda dövlət ixrac-idxal əməliyyatlarının əsas nizamlayıcı orqanıdır.