Azərbaycan, Bakı, 18 fevral /Trend, müxbir E.İsmayılov/
Martın 24-25-də Moskvada MDB-nin ətraf mühitin qorunması, enerji effektivliyi və bərpa edilən enerji mənbələri bölməsi üzrə işçi qrupunun birgə iclası keçiriləcək. Trend-in məlumatına görə, bu barədə Azərbaycanın da iştirakçısı olduğu MDB-nin Elektrik Enerjisi Şurasının rəsmi saytında yerləşdirilən məlumatda deyilir.
Məlumatda deyildiyinə görə, iclasda 2012-ci ildən sonra iqlim dəyişiklikləri üzrə istiqamətlər, bərpa edilən və alternativ enerji mənbələrinin enerji effektivliyi və inkişafı, "Müqayisəli təhlil, Aİ və MDB-nin elektrik enerjisində enerji effektivliyi, ekologiya və bərpa edilən enerji mənbələrinin inkişafının əsas məsələləri üzrə məlumat bankının yaradılması və müşayiət edilməsi" mövzusuna dair araşdırmaların aparılması daxil olmaqla, "Aİ və MDB-nin elektrik enerjisi bazarlarının birləşdirilməsinin əsas ekoloji məsələləri üzrə yol xəritəsi"nin monitorinqi üzrə hesabatın hazırlanması ilə bağlı məsələlər müzakirə ediləcək.
Martın 23-də İcraiyyə Komitəsi "dəyirmi masa" keçirəcək. Tədbir zamanı Birlik ölkələrinin bərpa edilən enerji mənbələrinin inkişafı və enerji resurslarından effektiv istifadəyə dair qanunvericilik tənzimlənməsi üzrə təcrübəsi, eləcə də bərpa edilən enerji mənbələrindən istifadənin elmi-texniki, ekoloji və maarifləndirmə aspektləri, bərpa edilən enerji mənbələri sahəsində layihələrin həyata keçirilməsi və enerji resurslarından effektiv istifadə ilə bağlı təcrübə və perspektivlər müzakirə ediləcək.
