Azərbaycan, Bakı, 14 mart /Trend, müxbir A.Bədəlova/
2011-ci ildə Azərbaycanda neft hasilatı sutkada 30 min bareldən 1,1 milyon barelədək artacaq. Belə proqnozlar OPEK-in neft bazarı üzrə mart ayı üçün məruzəsində göstərilir. Bu göstərici OPEK-in ötən ay üçün proqnozlaşdırdığı hasilat həcmindən (sutkada 15 min barel) cüzi azdır.
OPEK-in proqnozlarına görə, gələn il Azərbaycanda hasilatın ən yüksək səviyyəsi birinci rübdə - sutkada 1,11 milyon barel müşahidə ediləcək. İkinci və üçüncü rübdə hasilat sutkada 1,09 milyon barel, dördüncü rübdə isə 1,1 milyon barel təşkil edəcək.
OPEK-in qiymətləndirmələrinə görə, 2010-cu ildə ölkədə neft hasilatı sutkada 1,07 milyon barel təşkil edib.
BP şirkətinin məlumatına görə, 2010-cu ilin əvvəllərində Azərbaycanda sübut edilmiş neft ehtiyatları 7 milyard barel təşkil edib. 2009-cu ildə ölkədə neft hasilatı sutkada 1,033 milyon barel təşkil edib ki, bu da 2008-ci ildəki hasilatın həcmindən 13,5 faiz çoxdur.
Azərbaycanda hasil olunan neftin əsas həcmi "Azəri-Çıraq-Günəşli" dəniz yataqlar blokunun payına düşür. Bu sahədə tərkibində 0,15% kükürd olan (API üzrə 35 dərəcə) Azeri Light yüngül nefti hasil olunur.
"Azəri-Çıraq-Günəşli" layihəsinin iştirakçıları aşağıdakılardır: BP (operator - iştirak payının 34,43 faizi), "Chevron" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).