Azərbaycan, Bakı, 19 mart /Trend müxbir T.Cəfərov/
İranın Dövlət Neftdaşıma Şirkəti (NITC - National Iranian Tanker Co) 2013-cü ilədək tankerlərinin sayını artıracaq. Şirkət 22 ədəd 300 min ton dedveytlik VLCC tipli tanker alacaq. Bunu NITC-in regional məsələlər üzrə direktoru Rəhmət Qarə deyib. Bu barədə Trend İranın /mojnews.com/ saytı məlumat verir.
O, əlavə edib ki, NITC alınan yeni tankerlər sayəsində neftdaşıyan gəmilərinin sayına görə dünyanın böyük şirkətlərindən birinə çevriləcək.
"Beynəlxalq sanksiyalar NITC-in fəaliyyətinə heç bir təsir göstərməyib. Şirkət "Royal Dutch Shell", "Total", "Aramko" və digər şirkətlər tərəfindən istehsal olmuş xam neftin daşınmasını həyata keçirir", - Qarə deyib.
Onun sözlərinə görə, yeni 22 tankerin alınması ilə şirkətin tankerlərinin sayı 74-ə çatacaq. "Hazırda şirkətin balansında 300 min ton dedveytlik 28 ədəd VLCC tankeri var və 2013-cü ilədək onların sayı 50-yə çatacaq", - Qarə qeyd edib.
O, bildirib ki, NITC hazırda ümumilikdə, 43 tankerə sahibdir və xam neftdaşıması üzrə dünyada beşinci yeri tutur.
Şirkət rəsmisi deyib ki, İran 2010-cu ildə 104 milyon ton xam neft daşıyıb ki, bunun da 51 faizi Avropa istiqamətində olub.