Azərbaycan, Bakı, 19 iyul /Trend, müxbir E.İsmayılov/
İyulun 1-nə olan məlumata görə, Xəzərin Azərbaycan sektorundakı "Azəri-Çıraq-Günəşli" neft-qaz yataqları blokunun işlənməsi layihəsi həyata keçirildiyi vaxtdan Azərbaycan Dövlət Neft Fonduna (ARDNF) 52,8 milyard dollar vəsait daxil olub. Bu barədə Trend-ə Fonddan bildiriblər.
"Azəri-Çıraq-Günəşli" yataqlar blokunda hasilatın pay bölgüsü barədə saziş 1994-cü ildə imzalanıb.
Layihənin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
2010-cu ildə "Azəri-Çıraq-Günəşli" yataqlarından 2009-cu ildəki 40,3 milyon tona qarşı 40,6 milyon ton neft hasil edilib. 2010-cu ildə bu blokda sutkalıq neft hasilatı orta hesabla 823,1 min barel təşkil edib.