Azərbaycan, Bakı, 5 iyul/Trend, müxbir E. İsmayılov/
Azərbaycan Respublikası Dövlət Neft Şirkətinin (ARDNŞ) Ə.Əmirov adına Neftqazçıxarma İdarəsinin (NQÇİ) 2-ci mədən ərazisində 5 hektar sahədə neft şlamının bioremediasiya üsulu ilə təmizlənməsi işləri "Ekol Mühəndislik Xidmətləri" QSC tərəfindən başa çatdırılıb.
Trend-in ARDNŞ-nin rəsmi saytına istinadən verdiyi məlumata görə, müvafiq normalara uyğun olaraq yerinə yetirilmiş işlər "Azneft" İstehsalat Birliyinə təhvil verilib. ARDNŞ-nin Ekologiya İdarəsinin əməkdaşlarının iştirakı ilə keçirilmiş təhvil-təslim zamanı əraziyə vizual baxış keçirilib, təmizlənmiş sahənin coğrafi koordinatları müəyyənləşdirilib, aparılmış işlərin texnoloji tələblərə uyğunluğunu dəqiqləşdirmək üçün ərazidəki 5 nöqtədə iki qatdan 0,2-0,4 m dərinlikdə qrunt nümünələri götürülüb və Ekologiya İdarəsinin Kompleks Tədqiqatlar Laboratoriyasında təhlil olunub.
Aparılmış analizlərin nəticələrinə əsasən müəyyən edilib ki, bioremediasiya aparılmamışdan öncə ərazidə çirklənmiş torpağın tərkibində neft məhsullarının miqdarı 8-10 faiz, bioremediasiya işlərindən sonra isə 0,15-0,79 faiz olub.
ARDNŞ və onun iştirak etdiyi layihələr üzrə neftlə çirklənmiş ərazidə bioremediasiya üsulunun tətbiqi Azərbaycan Ekologiya və Təbii Sərvətlər Nazirliyi ilə razılaşdırılmış texnologiyanın tələbinə uyğun həyata keçirilib.