Azərbaycan, Bakı, 6 iyun /Trend, müxbir A.Bədəlova/
ARDNŞ (Azərbaycan Respublikası Dövlət Neft Şirkəti) BP şirkəti ilə birgə Bakının Qaradağ rayonunda tullantıların utilizasiyası üzrə mərkəz tikəcək. Trend-in məlumatına görə, bu barədə cümə axşamı "Xəzər neft və qaz - 2013" konfransının gedişi zamanı ARDNŞ-nin ekologiya üzrə vitse-prezidenti Rəfiqə Hüseynzadə bildirib.
Onun sözlərinə görə, mərkəz, əsasən, neft və qazma şlamlarının və lay sularının emalı üçün inşa olunacaq: "Layihənin dəyəri 60 milyon dollar qiymətləndirilir. Maliyyələşdirmənin 50 faizini ARDNŞ, 50 faizini isə BP şirkəti həyata keçirəcək".
Hüseynzadə bildirib ki, bununla bağlı yaxın vaxtlarda tender elan olunacaq və podratçı şirkət seçiləndən sonra tikinti işlərinə başlanacaq.
Onun sözlərinə görə, tullantıların utilizasiyası üzrə mərkəz 2013-cü ilin sonu - 2014-cü ilin əvvəlində istismara veriləcək.
Vitse-prezident qeyd edib ki, ARDNŞ-yə məxsus tullantıların utilizasiyası üzrə mərkəz köhnəlib və bütün növ tullantıların emalı imkanına malik deyil: "O cümlədən, BP şirkətinin də yeni növ mərkəzə ehtiyacı var".
