Azərbaycan, Bakı, 23 aprel /Trend, müxbir E.İsmayılov/
Azərbaycandan Türkiyəyə tədarük edilən qaza görə hesablamalar üçün tətbiq edilən "al və ya ödə" prinsipindən imtina ilə bağlı heç bir danışıqlar aparılmır. Trend-in məlumatına görə, bunu çərşənbə günü jurnalistlərə Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev deyib.
Onun sözlərinə görə, Türkiyə tərəfi bunu Rusiya və İranla müzakirə edir, lakin Azərbaycan tərəfi ilə bu məsələ qaldırılmayıb.
Qeyd edək ki, Türkiyənin energetika naziri Taner Yıldız bir müddət əvvəl bəyan etmişdi ki, rəsmi Ankara Azərbaycan və İrandan qaz tədarükləri üzrə müqavilələrin icrası prosesində "al və ya ödə" prinsipindən imtina etmək niyyətindədir.
