...

AÇG və Şahdəniz yataqlarında hasilatın həcmi açıqlanıb

Energetika Materials 26 Aprel 2022 18:16 (UTC +04:00)
AÇG və Şahdəniz yataqlarında hasilatın həcmi açıqlanıb
Kamran Qasımov
Kamran Qasımov
Bütün xəbərlər

Bakı. Trend:

2022-ci ilin birinci rübü ərzində Azərbaycanda 8,3 milyon tondan çox neft (kondensatla birlikdə) hasil edilib.

Trend bu barədə Energetika Nazirliyinə istinadən məlumat verir.

Respublika üzrə neft hasilatının 5,3 milyon tonu “Azəri-Çıraq-Günəşli”nin, 1,1 milyon tonu (kondensat) “Şahdəniz”in payına düşüb. SOCAR üzrə neft (kondensatla birlikdə) hasilatı 1,9 milyon ton təşkil edib. Hesabat dövründə 6,7 milyon tona yaxın neft (kondensatla birlikdə) ixraca nəql olunub.

Eyni zamanda, 2022-ci ilin yanvar-mart aylarında ölkədə 11,8 milyard kub metr təbii qaz hasil edilib. Qazın 3,5 milyard kub metri AÇG-dən, 6,4 milyard kub metri “Şahdəniz”dən, 1,9 milyard kub metri SOCAR üzrə hasil olunub.

Hesabat dövründə xaricə qaz satışı 5,9 milyard kub metr təşkil edib. Türkiyəyə 2,2 milyard kub metr, Avropaya 2,6 milyard kub metr, Gürcüstana isə 1,1 milyard kub metr qaz ixrac edilib. Qeyd edək ki, Türkiyəyə TANAP-la bu müddətdə 4 milyard kub metrdən çox qaz nəql olunub.

“Azəri-Çıraq-Günəşli” və “Şahdəniz” yataqları istismara veriləndən 01 aprel 2022-ci il tarixinədək 587 milyon tondan çox neft (kondensatla birlikdə) hasil edilib. “Azəri-Çıraq-Günəşli”dən 552 milyon tona yaxın neft, “Şahdəniz”dən isə 35 milyon tondan çox kondensat çıxarılıb.

Yataqlar istismara veriləndən 2022-ci ilin 01 aprel tarixinədək “Azəri-Çıraq-Günəşli”dən 193 milyard kub metrdən çox, “Şahdəniz”dən isə 164 milyard kub metrə yaxın qaz hasil edilib. Bu dövrdə “Şahdəniz” yatağından hasil edilən 112 milyard kub metrdən çox qaz ixraca nəql edilib.

Ölkədə neftin emalı 2022-ci ilin birinci rübündə 1,6 milyon ton təşkil edib.

Məqalədə:
Xəbər lenti

Xəbər lenti