"Şahdəniz" qaz-kondensat yatağının işlənməsi zamanı sərbəst qaz həcmi mövcud olarsa, Azərbaycan bu qazı əldə edə bilər. Bu barədə Trend ə respublikanın Sənaye və Energetika Nazirliyindən məlumat verilib.
Nazirliyin nümayəndəsinin sözlərinə görə, oktyabr ayından "Şahdəniz" yatağından qaz hasilatına və Cənubi Qafqaz qaz kəməri ilə nəqlinə başlanılacaq. Müqaviləyə görə, bu qaz Azərbaycana, Gürcüstana və Türkiyəyə veriləcək.
Lakin Nazirliyin nümayəndələrinin sözlərinə görə, əgər tərəflərdən biri qaz ala bilməzsə, onda Azərbaycan həmin qazı əldə edə biləcək. Bu zaman onun dəyəri bir qədər aşağı olacaq.
"Şahdəniz" yatağının işlənməsi üzrə operator olan BP Azerbaijan şirkətinin vitse-prezidenti Maykl Skitmorun sözlərinə görə, bu il yataqdan 850 mln kubmetrdən artıq qaz hasil olunacaq. Hasilata bu ilin üçüncü rübünün sonlarında başlanılacaq. Hasil olunan həcmdən 300 mln. kubmetr Azərbaycan, 500 mln. kubmetr Türkiyə, 50 mln. kubmetr Gürcüstan alacaq. Qazın bir hissəsi BTC Co-yə satılacaq ki, bundan da nasos stansiyalarında yanacaq kimi istifadə olunacaq.
