Azərbaycan, Bakı / Trend , müxbir S.Babayeva/ ÜDM-in strukturunda rabitə sektorundan daxil olan gəlirlərin payı 2007-ci ilin doqquz ayı ərzində 1,7%, artım isə 31% təşkil edib. Bu barədə Azərbaycanın Rabitə və İnformasiya Texnologiyaları Nazirliyinin yanvar-sentyabr ayları ərzində görülən işlərin yekunlarına həsr olunmuş kollegiyasında nazirliyin maliyyə, hesab və iqtisadi təhlil şöbəsinin rəhbəri Rəşad Nəbiyev məlumat verib.
Onun sözlərinə görə, rabitə sektorunda gəlirlərin 77%-i özəl sektorun payına düşüb, 70,2%-i isə mobil rabitə operatorlarının hesabına formalaşdırılıb.
Nazirlik üzrə orta əməkhaqqı 206,6 manat təşkil edib.
Bu dövr ərzində nazirliyin büdcə ayırmaları 16,5 mln. manat, Dövlət Sosial Müdafiə Fonduna daxil edilən vəsaitlər isə 6,9 mln. manat təşkil edib.
Rabitə Nazirliyinin müəssisələrinin gəlirlərinə gəlincə, Nəbiyev bildirib ki, bu göstərici proqnozlaşdırılımış 116,6 mln. manat əvəzinə, 131 mln. manat təşkil edib. Bu dövr ərzində nazirliyin müəssisələrində 316 iş yeri açılıb.