Azərbaycan, Bakı, 24 noyabr/ Trend , müxbir S.Babayeva/Azərbaycan rabitə və informasiya texnologiyaları nazirinin (RİTN) müavini İltimas Məmmədovun rəhbərlik etdiyi nümayəndə heyəti bazar ertəsindən Kuala -Lumpurda (Malayziya) səfərdədir. Bu barədə RİTN -dən məlumat verilib.
"Səfərdə məqsəd iki ölkə arasında qarşılıqlı faydalı əməkdaşlığın inkişafından ibarətdir", - deyə nazirlikdən bildiriblər.
Nümayəndə heyəti Malayziyanın "MEASAT" operatoru ilə otbitral mövqeyin əldə edilməsi, peykin orbitə buraxılması sahəsində təcrübə mübadiləsi və raket daşıyıcılarının seçilməsi üzrə danışıqlar aparacaq.
Səfər noyabrın 26 - dək davam edəcək.
Azərbaycanın rabitə peyki AzerSat-ın buraxılması üzrə layihənin dəyəri təqribən 200 mln. dollar qiymətləndirilir. Peykin əhatə dairəsinə Avropa və Asiyanın bir hissəsi - Qazaxıstan, Türkmənistan və İran daxil olacaq.
Nazirlikdə hesab edirlər ki, peyk 2010 - cu ildə buraxıla bilər. AzerSat -ın istismar müddəti 18 -19 ildir.
