Azərbaycan, Bakı, 23 oktyabr / Trend , müxbir H.Vəliyev/
Azərbaycanın Ədliyyə Nazirliyinin Notariat Arxivində notarial sənədlərin arxiv materiallarının elektron və kitab halına gətirilməsi üzrə işlər aparılır. Bu barədə Ədliyyə Nazirliyinin məlumatında deyilir.
Nazirliyin məlumatına görə, Dövlət Notariat Arxivinin məlumat bazasında 600 mindən çox notarial sənəd yerləşir.
Bu gün Azərbaycanda korporativ informasiya sisteminin yaradılması sahəsində Azərbaycan əhalisinin reyestrinin yaradılması əsasında vətəndaşların identifikasiyasının keçirilməsi kimi paralel aparılan işlərə böyük əhəmiyyət verilir.
Reyestrin təşkil edilməsi üzrə aparılan işlər Ədliyyə Nazirliyi və BMT-nin İnkişaf Proqramı arasında imzalanan Azərbaycan əhalisinin dövlət reyestrinin təşkil edilməsi layihəsi çərçivəsində həyata keçirilir. Hazırda başlanğıcını 1920-ci illərin ortalarından götürən vətəndaşların vəziyyəti barədə arxivin elektron formata keçirilməsi üzərində işlər aparılır. Reyestrin yaradılmasında əsas məqsəd əhalinin vəziyyəti barədə tam və aktual məlumata malik olmaqdır.
Dövlət reyestrində Azərbaycanın bütün vətəndaşları, həmçinin Azərbaycan ərazisində daimi yaşayan, vətəndaşlığı olmayan və əcnəbi şəxslər haqqında məlumatlar əks olunacaq. Dövlət reyestrinin tətbiqi Ədliyyə Nazirliyi yanında Dövlət Reyestri Xidmətinə həvalə olunub.
Reyestr imkanlarından istifadə bürokratik maneələri, sənəd süründürməçiliyini minimuma endirəcək və gələcəkdə "vahid pəncərə" prinsipinin tətbiqinə imkan verəcək. Reyestrin təşkil edilməsi ilə eyni vaxtda əhali itən sənədlərin də qüvvəyə minməsinə nail olacaq. İnternet şəbəkəsi vasitəsilə bəzi məlumatlara ictimai çıxış da təmin ediləcək.
Məqalə müəllifi ilə əlaqə ünvanı: [email protected]
