Bakı. Trend:
Dünya Bankı Azərbaycanda ÜDM artımının 2026-cı ildəki 1,2 faizdən 2027-ci ildə 1,8 faizə qədər sürətlənəcəyini gözləyir. Bu barədə bankın son hesabatında bildirilir.
Proqnoza əsasən, 2028-ci ildə Azərbaycan iqtisadiyyatı 1,9 faiz artacaq.
“2026-cı ildə Azərbaycanın iqtisadi artımının bir qədər – 2025-ci ildəki 1,4 faizlə müqayisədə 1,2 faizə qədər – yavaşlayacağı gözlənilir. Buna səbəb neft sektorunda struktur xarakterli azalmanın davam etməsi və dövlət kapital xərclərinin azalması fonunda qeyri-neft iqtisadiyyatının gözləniləndən daha zəif artmasıdır”, - deyə Dünya Bankının məlumatında bildirilir.
Eyni zamanda, Dünya Bankının analitiklərinin qiymətləndirmələrinə görə, Azərbaycanın qeyri-neft sektorunda daha yüksək artım templəri neft hasilatının azalmasına və planlaşdırılan büdcə konsolidasiyasına baxmayaraq, ümumi iqtisadi artımın 2026-cı ildəki 1,2 faizdən 2027-2028-ci illərdə orta hesabla 1,8 faizə qədər sürətlənməsinə imkan verəcək.
Qeyd edək ki, Azərbaycan Mərkəzi Bankının may ayında açıqladığı makroiqtisadi proqnoza əsasən, 2026-cı ildə ölkənin real ÜDM-i 1,1 faiz, qeyri-neft-qaz sektorunda artım isə 3,2 faiz təşkil edəcək.
Tənzimləyici qurum 2026-cı ildə neft-qaz sektorunun ümumi iqtisadi artımı ləngidəcəyini, iqtisadiyyatın əsas hərəkətverici qüvvəsinin isə qeyri-neft sahələri olaraq qalacağını gözləyir. AMB-nin qiymətləndirməsinə görə, qeyri-neft sektorunun artımının əsas amilləri ev təsərrüfatlarının istehlakı, mal və xidmətlərin xalis ixracı, eləcə də əsas kapitalın ümumi yığımı olacaq.
Mərkəzi Bankın proqnozuna görə, 2027-ci ildə iqtisadi artım 3,2 faizə qədər sürətlənəcək, qeyri-neft-qaz sektoru isə 4,7 faiz artacaq.
Tənzimləyici qurumun qiymətləndirməsinə görə, 2026-cı ildə neft-qaz sektoru 3,3 faiz azalacaq, 2027-ci ildə isə artım nümayiş etdirməyəcək: “Beləliklə, iqtisadiyyatın demək olar ki, bütün artımı qeyri-neft sektorunun hesabına təmin ediləcək”.
AMB həmçinin vurğulayıb ki, 2026-2027-ci illər üzrə iqtisadi artım proqnozlarının reallaşması böyük ölçüdə daxili və xarici məcmu tələbin dinamikasından asılı olacaq.
