Azərbaycan, Bakı, 30 iyul /Trend, müxbir H.Vəliyev/
Gəncə şəhərinin telekommunikasiya şəbəkəsi yeddirəqəmli nömrələr sisteminə keçiriləcək. Azərbaycanın Rabitə və İnformasiya Texnologiyaları Nazirliyinin məlumatında deyilir.
İdarənin məlumatına görə, yeddirəqəmli nömrələr sisteminə keçid yaxın vaxtlarda, ATS-lərin növbəti nəsil şəbəkəsinə (Next Generation Network - NGN) keçidi ilə bağlı işlərin başa çatmasından sonra həyata keçiriləcək.
NGN-ə keçid operatora təqdim olunan abonent servislərinin sayı ilə yanaşı, şəbəkənin nömrə tutumunu 37 min nömrəyədək artırmağa imkan verəcək.
Yeddirəqəmli nömrələr sisteminə keçidlə əlaqədar Gəncə şəhərinnin telefon nömrələri "5" indeksi ilə (554-xx-xx, 557-xx-xx və s.) başlayacaq.
Yeddirəqəmli nömrələr sisteminə keçid telekommunikasiya şəbəkəsində nömrə tutumu resursunu artırmağa imkan verəcək ki, bu da boş nömrələr qıtlığı problemini həll edəcək.
Gəncə Bakı, Sumqayıt və Naxçıvandan sonra, infrastrukturun inkişafının yeddirəqəmli nömrələrin tətbiqini tələb edən dördüncü bölgə olacaq.
