Azərbaycan, Bakı, 9 oktyabr / Trend,müxbir H.Vəliyev/
Azərbaycan və İran pul köçürmələrinin göndərilməsi üçün STEFİ sistemindən (Secured Transfer of Electronic Financial Information) istifadə edəcək. Bu barədə Trend-ə şənbə günü Azərbaycan Rabitə və İnformasiya Texnologiyaları Nazirliyinin poçt rabitə şöbəsinin müdiri Novruz Məmmədov deyib.
Məsələyə oktyabrn 5-7-də Tehranda Azərbaycan və İranın poçt rabitə administrasiyalarının əməkdaşlığı haqqında aparılan danışıqların növbəti mərhələsi zamanı baxılıb.
Məmmədovun sözlərinə görə, İran artıq STEFİ sisteminə qoşulub və bu sistemdən istifadə etməkdə Azərbaycan təcrübəsini öyrənmək niyyətindədir. Gələcəkdə iki ölkə arasında pul köçürmələri bilavasitə bu sistemlə həyata keçiriləcək ki, bunun üçün də ilkin razılıq əldə olunub.
"Tərəflər həmçinin beynəlxalq poçt istiqamətləri sahəsində əməkdaşlıq məsələləri, İranın ərazisindən NMR-a yerüstü poçt göndərişlərinin həyata keçirilməsi imkanlarını müzakirə ediblər",- Məmmədov deyib.
Azərbaycan tərəfi birgə poçt markalarının dərc edilməsi məsələsi üzrə onları Xəzərin ekologiyası mövzusunda, İran tərəfi isə dini mövzuda (məscidlərin təsviri ilə) dərc etməyi təklif edir.
Məmmədovun sözlərinə görə, Naxçıvan Muxtar Respublikasına poçt göndərişləri tranziti məsələsinə gəldikdə isə, bu gün bunun üçün lazımi şərait yaradılmayıb.
"İranda poçt göndərişləri proseduru digər daşıma prosedurlarına oxşardır ki, onlar da bizim tələblərə uyğun gəlmir.Biz hər iki ölkənin gömrük orqanları ilə danışıqlar yolu ilə bu proseduru sadələşdirməyi vacib hesab edirik. İran öz gömrük qurumları, Azərbaycan isə öz müvafiq orqanları ilə danışıqlar aparmağı öhdəsinə götürüb",- nazirliyin poçt rabitə şöbəsinin müdiri deyib.
Bu gün Azərbaycan öz ərazisi vasitəsilə İranın poçt göndərişlərinin Gürcüstana nəqlini təmin edir.
Azərbaycan İrana beynəlxalq poçt göndərişləri sahəsində əməkdaşlıq məsələsi üzrə Rusiya və Qazaxıstana poçt göndərişlərinin çatdırılması imkanalrını təklif edir. İran da öz növbəsində Azərbaycana öz ərazisi vasitəsilə İraq, Pakistan, Əfqanıstana poçt göndərişləri imkanlarını təklif edir.
Lakin bu məsələnin həlli hələ ki, hər iki ölkənin maraqlarından asılıdır.
İranla poçt rabitəsi sahəsində əməkdaşlıq 2009-cu il martın 10-da Azərbaycan prezidenti İlham Əliyevin Tehrana səfəri çərçivəsində hər iki ölkənin Rabitə və İnformasiya Texnologiyaları nazirlikləri arasında imzalanmış memorandum çərçivəsində aparılır.
İmzalanmış sənəd və memorandumda nəzərdə tutulmuş tədbirlərə müvafiq olaraq ikitərəfli görüşlərin müntəzəm şəkildə keçirilməsi planlaşdırılır.
