Azərbaycan, Bakı, 8 dekabr /Trend, müxbir H.Vəliyev/
"Microsoft"un pulsuz lisenziyalarının fəaliyyət müddəti qeyri-ticari və qeyri-hökumət təşkilatları, həmçinin Azərbaycanın kiçik, özəl KİV-i üçün 2012-ci il yanvarın 1-nə qədər qüvvədə olacaq. Bu barədə "Microsoft" şirkətinin məlumatında deyilir.
Yeni lisenziyalaşdırma sistemi bu istifadəçi qruplarına lisenziya müddəti artıq bitmiş Microsoft proqramlarından qanuni şəkildə istifadə etməyi davam etdirməyə imkan verəcək.
Pulsuz lisenziyaların alınması üçün Microsoft internet-resursunda müvafiq qeydiyyat prosedurundan keçmək lazımdır.
Pulsuz lisenziyalaşdırma üzrə yeni proqram Azərbaycanla yanaşı Rusiya, Belarus, Qazaxıstan, Qırğızıstan, Tacikistan, Türkmənistan, Özbəkistan, Çin, Malayziya, Vyetnamda da tətbiq edilir və gələcəkdə ölkələrin siyahısı daha da artacaq.
Bundan əvvəl Trend-ə "Microsoft Azerbaijan" nümayəndələyinin rəhbəri Teymur Axundovun bildirdiyi kimi, korporativ internet saytda qeydiyyatdan keçdikdən sonra təşkilat lisenziyaların müəyyən sayını almaq hüququ qazanacaq.
Həyata keçirilən proqramın əsas məqsədi "Microsfot" həllərinin qanunsuz istifadəsi bəhanəsi ilə bu strukturların fəaliyyətində maneələri aradan qaldırmaqdan ibarətdir.
