Azərbaycan, Bakı, 5 aprel /Trend, müxbir H.Vəliyev/
Beynəlxalq Telekommunikasiya İttifaqının (ITU - International Telecommunication Union) Radiorabitə Bürosu təsbit olunmuş stansiyaların yerüstü xidmətlərin tezlik mənimsəmələrinin məlumat bazasında (BRIFIC) qeydiyyatı üzrə nəticələri Azərbaycana təqdim edib. Bu barədə Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsinin (DRİ) məlumatında deyilir.
DRİ-yə daxil olan BRIFIC direktivlərinə görə, təsbit olunmuş xidmət stansiyalarına ötürülən radiostansiyaların, eləcə də rəqəmsal və analoji yayımların tədqiqatı üzrə prosesual qaydada lazımi işlər görülüb.
Məlumat bazasında BRIFIC-in beş beynəlxalq informasiya direktivi öz əksini tapıb. Onlarda Azərbaycanın rabitə administrasiyasına maneələr yaradan 56 təsbit olunmuş stansiya, 14 DVB - T stansiya, 62 FM və 49 analoq televiziya stansiyası üzrə məlumat yer alıb.
DRİ tərəfindən birinci rübün yekunları üzrə GЕ-06 (Cenevrə-06) sazişinə uyğun olaraq BRIFIC-də 23 DVB - T rəqəmsal televiziyanın və FM diapozonunda fəaliyyət göstərən yeddi stansiyanın qeydiyyatı barədə ərizə hazırlanıb və baxılmaq üçün ITU-ya təqdim edilib.
GЕ-06 sazişi rabitə administrasiyaları arasında tezlik ayırmalarının koordinasiyalarının aparılması imkanlarını nəzərdə tutur. GЕ-06 sazişinin mətnində yerüstü radioyayım xidmətlərinin modifikasiya və koordinasiya prosedurları təsvir olunub.
Radiorabitə reqlamenti qaydalarına görə, başqa ölkənin mövcud və ya planlaşdırılan stansiyaları üçün maneəyə səbəb ola biləcək hər hansı tezlik ayırmaları tezliklər barəsində beynəlxalq məlumat reyestrində qeydə alınmaq üçün ITU Radiorabitə Bürosuna məlumat verilməlidir.
