Azərbaycan, Bakı, 8 fevral /Trend, müxbir H.Vəliyev/
Hava şəraitinin pisləşməsi "Aztelekom" İstehsalat Birliyinin regionlarda işinə təsir etməyib. Bu barədə çərşənbə günü Trend-ə Rabitə və İnformasiya Texnologiyaları Nazirliyindən məlumat verilib.
İB gücləndirilmiş iş rejimində fəaliyyət göstərir və operativ qərargahdan yerlərlə əlaqə saxlanılır. Şaxtalı, qarlı və çovğunlu hava şəraiti ilə əlaqədar bütün qüvvələr səfərbər olunub. Qəza dəstələri baş verə biləcək problemin qarşısını almağa hazırdır.
Bu gün bəzi bölgələrdə elektrik enerjisi ilə bağlı problemlər olsa da, telefonların fasiləsiz işi elektrik qida qurğuları və dizel generatorları ilə təmin edilib.
Hazırda telekommunikasiya və rabitə qovşaqlarının işində heç bir problem müşahidə olunmur.