Azərbaycan, Bakı, 18 aprel /Trend, müxbir H.Vəliyev/
Son 6 ildə (2005-2011-ci illər) ümumi daxili məhsulda (ÜDM) əqli mülkiyyətin payı 2 faizdən 4,5 faizədək artıb. Bu barədə çərşənbə günü Trend-ə Müəllif Hüquqları Agentliyindən bildiriblər.
Müqayisə üçün, bu göstərici ABŞ-da 11 faiz təşkil edir. Azərbaycanda son 6 ildə proqram təminatı sahəsində piratçılığın səviyyəsi 8 faiz azalıb.
Hazırda Agentlik yanında Əqli Mülkiyyət Hüquqlarının Təminatı Mərkəzi işə salınıb. Mərkəzin əsas vəzifələri sahənin təhlilinin aparılması, proqnozlaşdırma və prioritet istiqamət və məqsədlərin müəyyənləşdirilməsinə kömək göstərmək, elektron mühitdə əqli mülkiyyətin idarə olunmasının təmin edilməsi və sairdir.
Ümumdünya Əqli Mülkiyyət Təşkilatı mərkəzin əqli mülkiyyət üzrə regional tədris mərkəzinə çevrilməsinə dəstək verməyə hazır olduğunu ifadə edib.
Hazırda əqli mülkiyyət hüquqlarının təmin edilməsinin gücləndirilməsinə kömək məqsədilə "Twinning" layihəsi reallaşdırılır. Layihə çərçivəsində mərkəzin formalaşdırılması və bu sahədə kadrların ixtisasının artırılması üzrə işlər aparılır.
Azərbaycan MDB ölkələri arasında əsərlərin qeydiyyatı sistemini tətbiq edən ilk ölkələrdən biridir. Hazırda agentlikdə 8 mindən artıq əsər və obyektin müəllif hüququ qeydiyyata alınıb. Agentlik yanında əsər və müəllif hüquqları qeydiyyatından keçən elektron baza yaradılıb, həmçinin, əqli mülkiyyət obyektlərinin onlayn-qeydiyyatı işə salınıb.
