Azərbaycan, Bakı, 11 sentyabr /Trend, müxbir Hüseyn Vəliyev/
"Unibank" ASC "Elektron hökumət" (e-gov.az) portalı vasitəsilə elektron arayışların verilməsi üzrə xidmətdən istifadə edəcək sayca üçüncü bank olacaq. Bu barədə Trend Rabitə və Yüksək Texnologiyalar Nazirliyinin Məlumat Hesablama Mərkəzinə (MHM) istinadən məlumat verir.
Məlumata görə, MHM-də "Unibank" ASC-nin nümayəndələri ilə birgə görüş keçirilib və "Elektron hökumət" portalı üzərindən vətəndaşlara aid fərdi məlumatlar üzrə elektron arayışların verilməsi layihəsi üzrə birgə əməkdaşlıq edilməsi barədə müzakirələr aparılıb. Layihənin prezentasiyasından sonra birgə əməkdaşlığa dair müqavilə imzalanması qərara alınıb və müqavilənin ilkin layihəsi hazırlanaraq "Unibank"a təqdim olunub.
Müqavilə şərtlərində səlahiyyətli bank əməkdaşlarına banka müraciət etmiş hər bir müştərinin yazılı razılıq ərizəsi əsasında "Elektron hökumət" portalı üzərindən "Vətəndaşa aid fərdi məlumatlar üzrə elektron arayış" e-xidməti vasitəsilə vətandaşın seçdiyi dövlət qurumlarının informasiya ehtiyatlarından onun haqqında fərdi məlumatların əldə olunmasına imkan yaradılması nəzərdə tutulur.
Eyni zamanda, müştəri özü haqqında fərdi məlumatları "Elektron hökumət" portalından qeydiyyatdan keçməklə özü formalaşdıraraq banka göndərə biləcək. Fərdi məlumatlar üzrə elektron arayışda vətəndaşın şəxsiyyət vəsiqəsi haqqında məlumatlar, Dövlət Sosial Müdafiə Fondu informasiya sistemlərindən məlumatlar, telefon nömrələri və borcları haqqında məlumatlar, müəllimlər, səhiyyə işçiləri və dövlət qulluğu informasiya sistemlərindən məlumatlar əks olunacaq.
Belə ki, müştəri kağız daşıyıcısında heç bir sənəd təqdim etməsə belə onun haqqında fərdi məlumatların onun öz razılığı əsasında Azərbaycan Respublikasının "Fərdi məlumatlar haqqında" Qanunununa uyğun qaydada səlahiyyətli bank işçiləri tərəfindən "Elektron hökumət" portalından əldə olunması mümkün olacaq və bu məlumatlar bank tərəfindən hüquqi sənəd kimi qəbul ediləcək.
Həmçinin MHM tərəfindən elektron imza həlləri haqda da geniş məlumat verilib. Belə ki, sənədlərin "online" imzalama imkanları bank sektorunda kreditlərin "online" ödənilməsi, "online" hərracların keçirilməsi kimi bir sıra üstünlüklər vermiş olacaq. MHM-nin təqdim texnoloji yeniliklər Unibank tərəfindən maraqla qarşılanmış və gələcək fəaliyyətdə qarşılıqlı əməkdaşlıq edilməsi qərara alınıb.
Artıq bu layihə üzrə birgə əməkdaşlıq edilməsi üçün MHM ilə "Bank of Baku" və "Bank BTB" arasında müqavilə imzalanıb və gələcəkdə digər banklarla da bu sahədə əməkdaşlıq edilməsi planlaşdırılır.
