Azərbaycan peyki üçün orbitdə yer 2008-ci ilədək müəyyən olunacaq. Bu barədə Trend Azərbaycan Rabitə və İnformasiya Texnologiyaları Nazirliyinin dövlət idarələri fəaliyyətinin koordinasiyası şöbəsinin müdiri Əflatun Məmmədova istinadən xəbər verir.
Onun sözlərinə görə, yalnız bundan sonra peyklərin quraşdırılması ilə məşğul olan müxtəlif şirkətlərlə danışıqlara başlamaq olar.
"Bu, kifayət qədər səy tələb edən geniş bir layihədir. Hazırda peykin orbitə buraxılmasının məqsədyönlüyü öyrənilir", - deyə nazirliyin nümayəndəsi vurğulayıb.
Bir qədər əvvəl Rabitə Nazirliyinə Qazaxıstan tərəfindən KazSat peykinin istifadəsinə dair təklif daxil olub. Hazırda həmin təklif baxılmaqdadır.
Azərbaycan artıq bununla bağlı Beynəlxalq Elektrik Rabitəsi İttifaqına müraciət edib. Peyk üçün orbitdə yer məhz bu qurum tərəfindən müəyyən olunacaq.
Peykin orbitə buraxılması məsələsi 2007-ci ildə Cenevrədə keçiriləcək Ümumdünya radio rabitəsi konfransında müzakirə olunacaq.
Orbitdə Azərbaycan üçün müvafiq yer ayrıldıqdan sonra, onun hazırlanması və texniki təchizatı üzrə işlərə başlanacaq.
Adıçəkilən layihəyə təqribən $80 mln-a yaxın investisiya nəzərdə tutulub.
Hazırda Azərbaycan Türkiyə və Avropanın peyklərindən istifadə edir.