Bakı. Trend:
Pakistanın Bəlucistan əyalətində silsilə terror aktları nəticəsində azı 73 nəfər həlak olub.
Trend xəbər verir ki, bu barədə xarici KİV-lər məlumat yayıb.
Qeyd edilib ki, avqustun 26-na keçən gecə baş verən ən kütləvi terror aktları təbii sərvətlərlə zəngin olan cənub-qərb əyalətinin Pakistanın tərkibindən çıxarılmasına çalışan separatçı radikal qruplar tərəfindən törədilib.
Silahlıların hücumları nəticəsində regionun inzibati mərkəzi ilə Pakistanın qalan hissəsi arasında qatarların hərəkəti dayandırılıb. Ekstremistlər Pakistanı İranla birləşdirən dəmir yolunu da partladıblar.
Bəlucistanda silsilə terror aktları avqustun 25-i axşam saatlarında başlayıb. Radikalların hədəfləri orduya çağırış məntəqələri, polis məntəqələri və əyalətin nəqliyyat infrastrukturu olub. Gün ərzində on şəhərdə terror aktları qeydə alınıb. Hücumlara görə məsuliyyəti Pakistanda qadağan edilmiş Bəlucistan azadlıq ordusu öz üzərinə götürüb.