Bakı. Trend:
İsveç Miqrasiya Agentliyi (Migrationsverket) vətəndaşlıq müraciətlərini qiymətləndirərkən daha sərt nəzarət tədbirləri tətbiq etməyə başlayıb. Məqsəd, milli təhlükəsizliyə təhdid yaradan şəxslərin vətəndaşlıq almasının qarşısını almaqdır.
Trend xəbər verir ki, yeni qaydalara əsasən, müraciət edən şəxslər şəxsiyyətlərini təsdiqləmək üçün idarəyə şəxsən gəlməli, həmçinin keçmişləri, iş yerləri, doğulduqları ölkə və səyahət tarixçələri haqqında ətraflı məlumat təqdim etməlidirlər.
Miqrasiya Xidmətinin rəsmisi Oskar Ekblad bildirib ki, bu cür tədbirlər vacibdir, çünki vətəndaşlıq verilməsi son qərardır və geri çağırıla bilməz. Nəzarətin gücləndirilməsi hökumətin bu ilin yanvarında verdiyi tapşırığa əsaslanır. Migrationsverket, həmçinin sənədlərin yoxlanılmasını daha da sərtləşdirməyi və şifahi müsahibələrin sayını artırmağı planlaşdırır.
Son illərdə İsveç Təhlükəsizlik Xidməti, vətəndaşlıq üçün müraciət edən şəxslərin təhlükə yarada biləcəyini təsdiq edən daha çox halları müəyyən edib. Əgər əvvəllər təhlükəsizlik səbəbiylə hər il təxminən 100-180 müraciət rədd edilirdisə, 2023-cü ildə bu rəqəm 756, 2024-cü ildə isə 566-ya yüksəlib. Bununla belə, milli təhlükəsizlik üçün təhlükə yaradan şəxslər, xüsusən də deportasiyası humanitar səbəblərlə mümkün olmayan, məsələn, edam və ya işgəncə riski daşıyan şəxslər İsveçdə qala bilərlər.
2023-cü ildə 65 min 591 nəfər İsveç vətəndaşlığı alıb.